মৰিগাঁৱত মৰাপাট খেতিয়কক দলবদ্ধ আক্ৰমণ

মৰাপাটতলীত জাল পাতিবলৈ অনুমতি নিদিয়াৰ বাবে সংঘটিত হ'ল এই কাণ্ড ৷ চিকিৎসালয়ত মৃত্যুৰে যুঁজিছে আহত দ্বীপেন ডেকা নামৰ মৰাপাট কৃষকজনে ৷

মৰিগাঁও, 19 আগষ্ট: মৰিগাঁও আৰক্ষী থানাৰ অন্তৰ্গত ভূঞাগুৰি গাঁৱত এজন মৰাপাট কৃষকৰ লগত সংঘটিত হৈছে এক দলবদ্ধ আক্ৰমণৰ ঘটনা ৷ ঘটনা অনুসৰি শনিবাৰে বিয়লি ভূঞাগাঁৱৰ মৰাপাঠ খেতিয়ক দ্বীপেন ডেকাক তেওৰ মৰাপাটতলীত গোপনে জাল পাতিবলৈ অহা চুবুৰীয়া আহতগুৰি গাঁৱৰ একাংশ দুষ্কৃতিকাৰীয়ে লাঠি-জোং লৈ দৌৰাই দৌৰাই উপৰ্যপুৰি প্ৰহাৰ কৰে ৷ যুৱক জনৰ চিঞৰ বাখৰ শুনি তেওক প্ৰহাৰৰ পৰা ৰক্ষা কৰিবলৈ আহে যদিও তেতিয়ালৈ দুষ্কৃতিকাৰী সকলে পলায়ন কৰে ৷ পাছত দেহৰ বিভিন্ন অংগত বেয়া কৈ আঘাত প্ৰাপ্ত দ্বীপেন ডেকাক মৰিগাঁও অসামৰিক চিকিৎসালয়ত ভৰ্তি কৰোৱা যদিও গুৰুতৰ জখমৰ বাবে উন্নত চিকিৎসাৰ বাবে চিকিৎসকে তেওক গুৱাহাটীলৈ প্ৰেৰণ কৰে ।

সম্প্ৰতি গুৱাহাটীৰ এখন ব্যক্তিগত নাৰ্চিংহোমত মৃত্যুৰ সৈতে যুঁজ দি আছে আহত দ্বীপেনে। ঘটনা সন্দৰ্ভত দ্বীপেন ডেকাৰ পিতৃয়ে মৰিগাঁও আৰক্ষী থানাত এটা গোচৰ ৰুজু কৰিছে ।