প্ৰধান শিক্ষকে পানীত দলিয়ালে চাউল
প্ৰধান শিক্ষকে পানীত দলিয়ালে চাউল ৷ চিৰাজুল ইছলামৰ বিৰুদ্ধে গোচৰ ৰুজু ৷ বিদ্যালয়ৰ আন্তঃগাঁথনিৰ বাবে আৱন্টিত ধনৰাশি খৰচ কৰাৰো অভিযোগ প্ৰধান শিক্ষকজনৰ বিৰুদ্ধে
মৰিগাঁও, 9 জুলাই : মধ্যাহ্ন ভোজনৰ চাউল প্ৰধান শিক্ষকে দলিয়ালে পানীত ৷ এই ঘটনা সংঘটিত হৈছে মৰিগাঁও জিলা লাহৰীঘাট প্ৰাথমিক শিক্ষা খণ্ডৰ পুৱবৰখাবল প্ৰাথমিক বিদ্যালয়ত । সোমবাৰে প্ৰধান শিক্ষক চিৰাজুল ইছলামে ৰহস্যজনক কাৰণত একাধিক চাউলৰ বস্তা বিদ্যালয়ৰ কাষৰ বিলৰ পানীত পেলাই দিয়ে । এই ঘটনা পোহৰলৈ অহাৰ পাচতেই স্থানীয় অভিভাৱক আৰু দল সংগঠনৰ নেতৃত্বই উচিত তদন্তৰ দাবী তুলিছে । প্ৰধান শিক্ষকৰ বিৰুদ্ধে ৰুজু কৰা হৈছে দুটাকৈ গোচৰ । স্থানীয় অভিভাৱকসকলৰ অভিযোগ অনুসৰি প্ৰধান শিক্ষক চিৰাজুল ইছলামে কেইবাবছৰ ধৰি বিদ্যালয়ৰ পৰিচালনা সমিতি গঠন নকৰি বিদ্যালয়ৰ আন্তঃগাঁথনিৰ বাবে আৱন্টিত ধনৰাশি নিজেই খৰচ কৰি আহিছে যদিও চকুত পৰা নাই লাহৰীঘাট কিম্বা মৰিগাঁও জিলা শিক্ষা বিষয়াৰ । সোমবাৰে এই ঘটনা পোহৰলৈ অহাৰ পাচতেই স্থানীয় এটা সংগঠনে প্ৰধান শিক্ষকৰ বিৰুদ্ধে দুটাকৈ গোচৰ ৰুজু কৰি তদন্তৰ দাবী জনায় । এতিয়া প্ৰশ্ন হৈছে কি কাৰণত বিলত পেলাই দিব লগীয়া হৈছে মধ্যাহ্ন ভোজনৰ চাউল । ছাত্ৰ-ছাত্ৰী অনুপাতে চাউল বেছি লাভ কৰে নেকি সেইটোও এতিয়া সন্দেহৰ বিষয় হৈ পৰিছে ৷