কবৰ খন্দি মৰনোত্তৰ পৰীক্ষাৰ বাবে প্ৰেৰণ মৃতদেহ

মৰিগাঁৱ জিলাৰ লাহৰীঘাটত সংঘটিত হৈছে এক হত্য়াকাণ্ডৰ ঘটনা ৷ কিন্তু আৰক্ষীক খবৰ নিদিয়াকৈ গোপনে কবৰ দিয়া হৈছিল মৃতদেহ ৷ অৱশেষত বুধবাৰে আৰক্ষীয়ে কবৰ খান্দি মৃতদেহ উলিয়াই মৰনোত্তৰ পৰীক্ষাৰ বাবে প্ৰেৰণ কৰিছে ৷

মৰিগাঁৱ, 31 জুলাইঃ মৰিগাঁৱ জিলাৰ লাহৰীঘাটত আৰক্ষীয়ে খান্দি উলিয়ালে কবৰ দিয়া মৃতদেহ ৷ ঘটনা অনুসৰি, জিলাখনৰ লাহৰীঘাট থানাৰ অন্তৰ্গত অমৰাগুৰি গাঁৱৰ বাসিন্দা গোলাপ হুছেইনৰ পুত্ৰৰ লগত বিয়া হৈছিল কছাৰীবড়ী গাঁৱৰ আব্দুৰ ৰহিমৰ ছোৱালী ফৰিদা খাতুন ৷ কিন্তু বিয়াৰ পিচৰে পৰাই পৰিয়ালৰ লোকে যৌতুকৰ নামত অকথ্য হাৰাশাস্তি কৰি আহিছিল ফৰিদাক ৷ কিন্তু মঙলবাৰে হঠাতে ফৰিদাৰ স্বামীগৃহৰ পৰা ফৰিদাৰ পিতৃগৃহলৈ আহে অবাঞ্চিত মৃত্যুৰ খবৰ ৷ ফৰিদাৰ পিতৃ পৰিয়ালে মৃতদেহ চাবলৈ আহে যদিও চাবলৈ নিদি মৃতদেহটো কবৰস্থ কৰে স্বামীৰ পৰিয়ালে ৷ ইয়াৰ পিচতে ফৰিদাৰ পিতৃৰ পৰিয়ালে ঘটনা সন্দৰ্ভত লাহৰীঘাট আৰক্ষী চকীত এজাহাৰ দাখিল কৰে ৷ অৱশেষত লাহৰীঘাট আৰক্ষী আৰু লাহৰীঘাট ৰাজহ চক্ৰ বিষয়া শ্ৰীযুত সুৰিজৎ কলিতাৰ উপস্থিতিত মৃতদেহটো কবৰৰ পৰা উলিয়াই মৰনোত্তৰ পৰীক্ষাৰ বাবে মৰিগাঁও অসামৰিক চিকিৎসালয়লৈ প্ৰেৰণ কৰে ৷