মৰিগাঁৱত শৌচাগাৰৰ পৰা আটক গৰু চোৰ

মৰিগাঁৱত আটক গৰু চোৰ ৷ শৌচাগাৰত আত্মগোপন কৰা অৱস্থাত আৰক্ষীয়ে আটক কৰে চোৰটোক ৷

মৰিগাঁও,28 এপ্ৰিল:শেহতীয়াভাৱে মৰিগাঁৱত গৰু চোৰে টোপনি হৰিছে কৃষকৰ ৷ দীৰ্ঘদিনৰ পৰা প্ৰায়ে জিলাখনৰ বিভিন্ন ঠাইত একাংশ গৰু চোৰে উপদ্ৰৱ চলোৱাত অতিষ্ঠ হৈ পৰিছিল স্থানীয় ৰাইজ ৷ কিছুদিনৰ আগত মৰিগাঁৱৰ শলমাৰীৰ বিচিত্ৰ বৰদলৈ, চকাবৰ তিমুং, হিতেশ্বৰ বৰদলৈৰ গোহালীৰ পৰা চুৰি হৈছিল বহুকেইটা গৰু । তাৰ পাচতে শলমাৰীৰ একাংশ লোকে গৰু চুৰি চক্ৰৰ সম্ভেদ পোৱাত নিশাৰ ভিতৰতে অভিযান চলাই মৰিগাঁও অসামৰিক চিকিৎসালয়ৰ পাছফালে মিৰ্জা নামৰ এজন লোকে অবৈধভাৱে গো-মাংস কাটি থকা অৱস্থাত উদ্ধাৰ কৰিছিল ৷ লগে লগে লোকজনে ঘটনাস্থলীৰ পৰা পলায়ন কৰে ৷

তাৰ পাচতে স্থানীয় লোকে ঘটনা সন্দৰ্ভত আৰক্ষীৰ ওচৰত এজাহাৰ দাখিল কৰাত মঙলবাৰে পুৱা ধৰমতুল আৰক্ষীয়ে গোপন সূত্ৰৰ পম খেদি অসামৰিক পোচাকত আহি মিৰ্জাৰ ঘৰত অভিযান চলায় । আৰক্ষীৰ সম্ভেদ পাই গৰু চোৰ চৰ্দা মিৰ্জাই শৌচাগাৰত আত্মগোপন কৰে ৷ অৱশেষত আৰক্ষীয়ে গ্ৰেপ্তাৰ কৰে গৰু চোৰ মিৰ্জাক ৷ ইতিমধ্যে আৰক্ষীয়ে মৰিগাঁও জিলাৰ বহু অঞ্চলৰ পৰা গৰু চুৰি চক্ৰই মিৰ্জাৰ ঘৰত চুৰি গৰু যোগান ধৰাৰ লগতে গো-মাংসৰ অবৈধ বেহা চলাই থকাৰ তথ্য লাভ কৰিছে ৷ এই চক্ৰৰ লগত জড়িত আন ব্যক্তিসকলৰ অনুসন্ধানত নামি পৰিছে তদন্তকাৰী দল ৷

লগতে পঢ়ক :ধুবুৰীত বন বিভাগৰ অভিযানত বৃহৎ পৰিমাণৰ চোৰাং কাঠ জব্দ