মৰিগাঁও, 20 জানুৱাৰী: "মই গভীৰভাৱে বিশ্বাস কৰোঁ এটা জাতি ভাষা, কৃষ্টি-সংস্কৃতি, পৰম্পৰা আদিৰ সজীৱতাৰ ওপৰতহে এটা জাতি বা জনগোষ্ঠীৰ ৰূপৰেখা নিৰূপণ কৰিব পাৰি । সংস্কৃতিৰ পৰিসৰ বুলিলে কেৱল নাচ-গানৰ মাজতে সীমাবদ্ধ নহয় ।" শুকুৰবাৰে ঐতিহাসিক জোনবিল মেলাত মুখ্য অতিথি ৰূপে অংশগ্ৰহণ কৰি এই মন্তব্য কৰে মুখ্যমন্ত্ৰী ড৹ হিমন্ত বিশ্ব শৰ্মাই (Himanta Biswa Sarma attended Jonbeel Mela) । তিৱা জনগোষ্ঠীটোৰ সুকীয়া বৈশিষ্ট্য, পৰম্পৰা সন্দৰ্ভত ব্যাখ্যা আগবঢ়াই মুখ্যমন্ত্ৰী শৰ্মাই উল্লেখ কৰে যে, যিকোনো এটা জাতি বা জনগোষ্ঠীৰ সংস্কৃতিৰ বৰঘৰটো দুৰ্বল হ‘বলৈ দিলে বিশ্বায়নৰ আগ্ৰাসনত ডুব যাব ।
উল্লেখযোগ্য যে, শুকুৰবাৰ জোনবিলৰ বাকৰিত গোভাৰজাৰ লগতে আন সোতৰগৰাকী প্ৰতীকী ৰজাক বিগত বছৰ সমূহৰ বিপৰীতে এইবেলি এক লাখ পঁচিশ হাজাৰ টকাৰ এককালীন সাহায্যৰ চেক প্ৰদান কৰে মুখ্যমন্ত্ৰী ড৹ হিমন্ত বিশ্ব শৰ্মাই ৷ জোনবিল মেলাৰ বাবে বিশ বিঘা মাটি যোগাৰ কৰিবলৈও স্থানীয় বিধায়ক তথা অসম চৰকাৰৰ জলসম্পদ মন্ত্ৰী পীযুষ হাজৰীকাক দায়িত্ব দিয়ে মুখ্যমন্ত্ৰীয়ে (Govt decides to provide land fo Jonbeel mela) ৷ আগন্তুক জোনবিল মেলাৰ মেলা পৰিচালনা সমিতিৰ হাতত অৰ্পণ কৰিব পৰাকৈ মাটি যোগাৰৰ নিৰ্দেশ মুখ্যমন্ত্ৰীৰ ৷
মুখ্য অতিথিৰ ভাষণত মুখ্যমন্ত্ৰী শৰ্মাই জনগোষ্ঠীৰ পৰম্পৰা, খাদ্যাভাসসমূহ বৰ্তাই ৰখাৰ স্বাৰ্থত তথা বিলাতী সুৰাৰ প্ৰতি মোহ এৰি দিয়াৰ স্বাৰ্থত এনে নৃগোষ্ঠীয় মেলা সমূহত সাজপানী, ৰহি, ফটিকা বা আপং আদি দ্বিধাহীনভাৱে সেৱন কৰিবলৈও মুকলিকৈ ঘোষণা কৰে (Traditional foods in Jonbeel mela) । আনহাতে পাহাৰ আৰু ভৈয়ামৰ মাজত যাতে সমন্বয়ৰ জৰীডাল মজবুত কৰিব পাৰে, ইয়াৰ বাবে মৰিগাঁৱৰ ঔগুৰিৰ পৰা পশ্চিম কাৰ্বি আলঙলৈ জৰাজীৰ্ণ পথচোৱা শীঘ্ৰেই উন্নত কৰাৰ কথা ঘোষণা কৰে মুখ্যমন্ত্ৰীয়ে ।