মাজুলী,10 মে’ঃলক্ ডাউনৰ বাবে বন্ধ ৰাজ্যৰ বিদ্যালয়সমূহ ৷ ঘৰতে বিদ্যালয়ৰ পৰিৱেশ সৃষ্টি কৰি নিয়মীয়া পাঠগ্ৰহণ কৰি আহিছে মাজুলীৰ এখন বিদ্যালয়ৰ ছাত্ৰ-ছাত্ৰীয়ে ৷ কিন্তু হঠাতে দেওবাৰে ছাত্ৰ-ছাত্ৰীসকলৰ ঘৰে ঘৰে শুনা যায় কান্দোনৰ ৰোল ৷ কান্দোনৰ উৎস বিচাৰি দেখা গ’ল এক নান্দনিক পৰিৱেশ ৷ বিদ্যালয়খনে ঘোষণা কৰা কাৰ্যসূচী অনুসৰি ছাত্ৰ-ছাত্ৰীসকলে সামাজিক দুৰত্ব অটুট ৰাখি ঘৰতে পালন কৰে মাতৃ দিৱস ৷
আনহাতে, মাতৃ দিৱস উপলক্ষে প্ৰতিগৰাকী ছাত্ৰ-ছাত্ৰীয়ে মাতৃসকলৰ ভৰি ধুৱাই ধূপ-দীপ নৈবেদ্যৰে দেৱীৰূপত পূজা-আৰাধনা কৰে ৷ মা আৰু সন্তানৰ মমতাৰ স্মৃতি দোহাৰি গোৱা গীতে মুগ্ধ কৰে উপস্থিত সকলোকে ৷ বিদ্যালয়খনৰ প্ৰধান আচাৰ্যই মাতৃসকলক উদ্দেশ্যি দিয়ে ভাষণ ৷ মাজুলীৰ বনগাঁও শংকৰদেৱ শিশু নিকেতনে এইদৰে ব্যতিক্ৰমভাৱে পালন কৰে মাতৃ দিৱস ৷ আনুষ্ঠানিকভাৱে বিদ্যালয় বন্ধ থকা বাবে ছাত্ৰ-ছাত্ৰীসকলৰ ঘৰে ঘৰে এনেদৰে পালন কৰে মাতৃ দিৱস ৷ মাতৃৰ প্ৰতি দেখুওৱা ছাত্ৰ-ছাত্ৰীসকলৰ ভক্তিত উচুপি উঠে প্ৰতিগৰাকী মাতৃ ৷
লগতে চাওকঃকৃষক সন্মান নিধিৰ তালিকাত পঞ্চায়ত প্ৰতিনিধিৰ আত্মীয়ৰ নাম !