মাজুলী, ২ ছেপ্তেম্বৰ: ব্ৰহ্মপুত্ৰৰ জলস্তৰ বৃদ্ধি হোৱাৰ বাবে কেইবাদিনো ধৰি মাজুলী-নিমাতী ফেৰী সেৱা বন্ধ হৈ থকাৰ পাছত অৱশেষত বৃহস্পতিবাৰৰ পৰা পুনৰ আৰম্ভ কৰা হ'ল ফেৰী সেৱা । মাজুলী জিলা প্ৰশাসনে নিৰ্দেশমৰ্মে আৰম্ভ কৰা হৈছে ফেৰী সেৱা ।
বিগত দুটা দিনত ব্ৰহ্মপুত্ৰৰ জলস্তৰ কিছু পৰিমাণে হ্ৰাস পাইছে ৷ সেয়ে মাজুলী-নিমাতী ফেৰী সেৱা পুনৰ স্বাভাৱিকভাৱে আৰম্ভ কৰা হৈছে । পানী বাঢ়ি থকাৰ সময়ত নদীৰে যাতায়াত কৰিলে দুৰ্ঘটনা সংঘটিত হোৱাৰ আশংকাত যোৱা ২৭ আগষ্টৰ পৰা মাজুলী জিলা প্ৰশাসনে এই সেৱা বন্ধ ৰখাৰ নিৰ্দেশ দিছিল ।
পুনৰ আৰম্ভ হ'ল মাজুলী নিমাতী ফেৰী সেৱা
এতিয়া বৃহস্পতিবাৰৰ পৰা জিলা প্ৰশাসনে ফেৰীৰ চলাচলত অনুমতি প্ৰদান কৰিছে যদিও ফেৰীঘাটৰ ৰেম্পসমূহ সূচল নোহোৱাৰ বাবে ফেৰীবোৰত চাৰিচকীয়া বাহন নিয়াত নিষেধাজ্ঞা আৰোপ কৰা হৈছে । মাজুলী জিলা প্ৰশাসনে মাত্ৰ সাধাৰণ যাত্ৰী আৰু দুচকীয়া বাহন নিয়াতহে অনুমতি দিছে ।