মাজুলী, 22 মাৰ্চঃ বৰ্তমান সমগ্ৰ বিশ্বতে আতংকৰ সৃষ্টি কৰা কৰ'ণা ভাইৰাছৰ পৰা পৰিত্ৰাণ পাবৰ বাবে মাজুলীৰ শ্ৰী শ্ৰী উত্তৰ কমলাবাৰী সত্ৰত দেওবাৰে সন্ধিয়া বন্তি প্ৰজ্বলন কৰে ভকত বৈষ্ণৱ সত্ৰাধিকাৰে । কৰ'ণাৰ আতংকৰ বাবে মাজুলীত শ্ৰীশ্ৰী উত্তৰ কমলাবাৰী সত্ৰত বন্তি প্ৰজ্বলন কৰি মাধৱদেৱৰ কাকুতি ঘোষা 'কিমতে ভকতি কৰিবো তোমাক' প্ৰাৰ্থনা কৰে । প্ৰধানমন্ত্ৰীৰ আহ্বান জনাই দিনটো জনতা কাৰ্ফিউ মানি ভকত বৈষ্ণৱ সকলে ৫ বজাৰ লগে লগে শৃংখলিতভাৱে একমিটাৰ দূৰত্ব বজাই ৰাখি কীৰ্তন ঘৰত দৱা শংখ, খোল তাল হাতচাপৰি বজায় । তাৰ পাছতে সকলোৱে কাকুতি ঘোষা গায় । মহামাৰী কৰ'ণাৰ পৰা পৰিত্ৰাণ বিচাৰি বন্তি প্ৰজ্বলন কৰি এনেদৰে প্ৰাৰ্থনা কৰে । সত্ৰ খনত সত্ৰাধিকাৰ জনাৰ্দন দেৱ গোস্বামীয়ে বিশ্বৰ সুমংগল কামনা কৰে । লগতে কৰ'ণা ভাইৰাছত আক্ৰান্ত সকলৰ আশু আৰোগ্য কামনা কৰে ভকত সকলে । আন আন সত্ৰতো সমূহীয়াভাৱে দৱা খোল তাল হাতচাপৰি বজায় ।
মাজুলী সত্ৰত বিশ্ব মংগলৰ বাবে বাজিল দবা শংখ