গুৱাহাটী, ৬ মাৰ্চ: মাতৃ ঢুকোৱাৰ এবছৰৰ মূৰত মাজুলীত আন এগৰাকী মাতৃ পালে লুৰীণজ্যোতি গগৈয়ে (Lurinjyoti Gogoi in Majuli)। তেওঁৰ নাম চুনু দাস আৰু ঘৰ মাজুলীৰ দক্ষিণ কমলাবাৰীৰ আলিমুৰত ।
শনিবাৰে লুৰীণজ্যোতি গগৈক নিজৰ পুত্ৰ বুলি কৈ পোষ্টাৰ লগাই থকা এটা ভিডিঅ' ভাইৰেল হৈছিল চুনু দাসৰ । যিটো ভিডিঅ' দেখি দেওবাৰে মহিলগৰাকীক মাত লগাবলৈ গৈছিল লুৰীণজ্যোতি গগৈ । নিজৰ পুত্ৰজ্ঞান কৰা লুৰিণজ্যোতি গগৈক চকুৰ সন্মূখত দেখা পাই আৱেগিক হৈ বুকুত সাৱটি লয় মহিলাগৰাকীয়ে । তেওঁ কয় -' তোমাৰ মা নাই, আজিৰে পৰা ময়েই তোমাৰ মা । মোক মা বুলি মাতিবা ।'
মাতৃৰ অবৰ্তমানত মাতৃৰ সন্ধান পালে লুৰীণে উৰুখা পজাত থকা এগৰাকী সহজ-সৰল মাতৃৰ অকৃত্ৰিম মৰম দেখি আৱেগিক হৈ পৰে লুৰীণজ্যোতি গগৈ । দুয়োধাৰে বৈ আহে চকুলো । লুৰীণজ্যোতি গগৈক উদ্দেশি চুনু দাসে কয়-‘‘ তোমাৰ ভাল হোৱাৰ কামনাৰে মন্দিৰত পূজা আগবঢ়াম বুলি আগ কৰি থৈছো ।’’ অতি সহজ-সৰল স্বভাৱৰ চুনু দাসে মৰমৰ চিনস্বৰূপে এটা কুচিয়া মাছ লুৰিণজ্যোতি গগৈলৈ উপহাৰ হিচাপে আগবঢ়ায় ।
এক আবেগিক পৰিৱেশৰ মাজতে চুনু দাসৰ স্বামীয়ে লুৰীণজ্যোতি গগৈক উদ্দেশি কয়-' আপোনাক মই ইমান ভাল পাওঁ যে কালি আপুনি ভাওনালৈ আহিছিল ৷ মই আপোনাৰ ওচৰলৈ যাব নোৱাৰি আপোনাৰ গাড়ীখনকে চুই চাইছিলো ।' মাজুলীত আজি অকৃত্ৰিম ভালপোৱা আৰু মৰমৰ মাজত লুৰিণজ্যোতি গগৈয়ে পালে আন এগৰাকী মাতৃ (Mother of Lurinjyoti Gogoi)।
লগতে পঢ়ক:বিহু পতাকলৈ আপত্তি কৰাৰ অধিকাৰেই নাই মুখ্যমন্ত্ৰীৰ : ড৹ হিমন্ত বিশ্ব শৰ্মা
