মাজুলী, 19 জুলাই : নদীদ্বীপ জিলা মাজুলীৰ মাজগাঁওত বসবাস কৰা তিনিগৰাকী অবিবাহিত দৰিদ্ৰ মহিলাৰ কৰুণ গাঁথা ৷ বিশেষভাৱে সক্ষম অৰুণা কলিতা, দীৰ্ঘদিনে অসুস্থ হৈ আছে 70 বছৰীয়া আইজনী কলিতা ৷ বীণা কলিতাই বনৰীয়া কচু, ঢেকীয়া বিক্ৰী কৰি উপাৰ্জন কৰা দুপইচাৰে ভোক নিবাৰণ কৰি জীৱন যুঁজ অব্যাহত ৰাখিছে এই তিনিওগৰাকী মহিলাই ৷
এখন জৰাজীৰ্ণ ঘৰতে বাস কৰিছে এওঁলোকে ৷ ঘৰৰ বেৰবোৰ ভাগি উৱলি গৈছে ৷ কেনেবাকৈ ৰ’দ-বৰষুণৰ পৰা পৰিত্ৰাণ পাবলৈ ব্যৱস্থা কৰি থৈছে ৷ বৰষুণ-ধুমুহা আহিলে বিচনাৰ তলত সোমাই বিনিদ্ৰ ৰজনী কটাই মৰণক শৰণ দি পাৰ কৰে নিশা ৷
মাজুলীৰ তিনিগৰাকী মহিলাৰ জীৱন সংগ্ৰাম
বান-খহনীয়াত সৰ্বহাৰা তিনিগৰাকী মহিলাই 7 বাৰ ভেটি সলাই ভৰ যৌৱন পাৰ কৰিলে । বিবাহৰ বাবে যোগ্য আছিল যদিও দৰিদ্ৰতাৰ মহা সংগ্ৰামখনে জীৱনৰ ৰং, বিবাহ সকলো কাঢ়ি নিলে ৷ এতিয়া কেৱল জীয়াই থকাৰ সংগ্ৰাম অব্যাহত ৰাখিছে তিনিওগৰাকী মহিলাই ।