মাজুলী, 18 অক্টোবৰ : "তুলসীৰ তলে তলে মৃগ পহু চৰে, তাক দেখি ৰামচন্দ্ৰই হৰ ধনু ধৰে" ৷ আজি অসমীয়াৰ বাপতি সাহোন কাতি বিহু । কাতি বিহুক যদিও কঙালী বিহু বুলি কোৱা হয়, তথাপিও সমগ্ৰ ৰাজ্যৰ লগতে মাজুলীতো কাতি বিহুক লৈ ব্যাপক উৎসাহ দেখা গৈছে ।
ঘৰৰ চোতালত মাটিৰে তুলসীৰ ভেঁটি নিৰ্মাণ কৰাত পুৱাৰ পৰা ব্যস্ত হৈ পৰিছে কণ কণ শিশুকে ধৰি বয়োজ্যেষ্ঠগৰাকী । এই তুলসী ভেঁটিৰ তলত সন্ধিয়া চাকি-বন্তি জ্বলাই নাম-প্ৰসংগ কৰি ভগৱন্তৰ চৰণত সেৱা আগবঢ়াব সকলোৱে । তুলসীৰ তলত জ্বলোৱা এই চাকিৰ পোহৰে যেন নিঃশেষ কৰক সমাজৰ অসূয়া-অমংগল ।
চহা কৃষকসকলে সেউজীয়া হৈ পৰা ধাননি পথাৰত চাকি জ্বলাই পোক-পতংগৰ পৰা পৰিত্ৰাণ বিচাৰি কঙালীৰ গৰ্ভত ভোগালীৰ বীজ উৎপত্তি হ’বলৈ প্ৰাৰ্থনা জনাব । সকলোৰে এটাই আশা, কৰ’ণা ভাইৰাছে দুটাকৈ বছৰত যি ভয়াৱহ ৰূপ ল‘লে, সেয়া তুলসীৰ তলত জ্বলোৱা চাকিৰ পোহৰে নাইকিয়া কৰক ।
উল্লেখ্য যে, অসমীয়া জনজীৱনক কাতি বিহুৰ প্ৰচলিত লোকাচাৰসমূহে এক সুকীয়া মৰ্যদা প্ৰদান কৰিছে । বিভিন্ন কৃষি সম্পৰ্কীয় বিশ্বাস, ধৰ্মীয় তথা আধ্যাত্মিক বিশ্বাস কাতি বিহুৰ সৈতে নিবিড়ভাৱে জড়িত হৈ আছে ।
লগতে পঢ়ক :ৰাজ্যত পেঞ্চন বিতৰণৰ ক্ষেত্ৰত সংস্কাৰ অনাৰ বাবে কেতবোৰ সিদ্ধান্ত
