Ferry services disrupted : ব্যাহত মাজুলী নিমাতী সংযোগী ফেৰী সেৱা; সমস্যাত যাত্ৰী

ব্যাহত মাজুলী নিমাতী সংযোগী ফেৰী সেৱা ৷ ঘন কুঁৱলীৰ বাবে নৈৰ মাজত আৱদ্ধ যাত্ৰীবাহী ফেৰীৰ লগতে 108 নৌকা এম্বুলেন্স সেৱা ৷

মাজুলী, 20 জুন : ৰাজ্যত ধাৰাবাহিকভাৱে অব্যাহত থকা বৰষুণে বিপৰ্যস্ত কৰিছে সাধাৰণ জীৱন-যাত্ৰা ৷ জলপথেৰে যাতায়ত কৰা যাত্ৰীসকলে বৰ্তমান দুৰ্ভোগ ভোগা পৰিলক্ষিত হৈছে ৷ ধাৰাষাৰ বৰষুণৰ ফলত ব্ৰহ্মপুত্ৰ নদীৰ জলস্তৰ বৃদ্ধি হোৱাৰ ফলস্বৰূপে মাজুলী নিমাতী সংযোগী ফেৰী সেৱা ব্যাহত হৈ পৰিছে ৷

উল্লেখ্য যে, যোৱা দেওবাৰৰ পৰা ব্ৰহ্মপুত্ৰ নদীৰ জলস্তৰ কমিছে যদিও সুচলভাৱে চলা নাই মাজুলী নিমাতী সংযোগী ফেৰী সেৱা ৷ ঘন কুঁৱলী থকাৰ বাবে অইন দিনাৰ দৰে আজিও মাজুলী নিমাটি সংযোগী ফেৰি চলাচলত ব্যাঘাত জন্মা বুলি জানিবলৈ পৰা গৈছে । ঘন কুঁৱলীৰ বাবে বাতৰি সংগ্ৰহ কৰা পৰলৈকে অফলা নিমাতি, কমলাবাৰী নিমাতি ফেৰী সেৱা আভ্যন্তৰীণ জল পৰিবহন বিভাগে বন্ধ ৰাখিছে বুলি জানিবলৈ পৰা গৈছে ।

পুৱাৰে পৰা নদীৰ ইপাৰ-সিপাৰ হ’বলৈ পাৰঘাটত যাত্ৰীয়ে ভিৰ কৰা পৰিলক্ষিত হৈছে যদিও বতৰৰ প্ৰতিকূলতাৰ বাবে আভ্যন্তৰীণ জল পৰিবহন বিভাগে ফেৰী সেৱা বন্ধ ৰখাৰ সিদ্ধান্ত গ্ৰহণ কৰে । বিষয়টো সন্দৰ্ভত বিভাগে অধিক জানিবলৈ দি ব্ৰহ্মপুত্ৰ নদীত কুঁৱলীৰ মাত্ৰা হ্ৰাস পালেহে ফেৰী সেৱা চলিব বুলি কয় ।

ঘন কুঁৱলীৰ বাবে ব্যাহত ফেৰী সেৱা

উল্লেখ্য যে, প্ৰতিকূল বতৰৰ বাবে ব্ৰহ্মপুত্ৰ নদীৰ মাজত এখন যাত্ৰীবাহী ফেৰী আৰু এখন জৰুৰীকালীন 108 সেৱা নৈৰ মাজত আৱদ্ধ হৈ পৰিছিল । মাজুলী পৰা নিমাতি ঘাটত ৰোগী থৈ মাজুলীলৈ উভতাৰ পথত ব্ৰহ্মপুত্ৰৰ মাজত কুঁৱলীৰ বাবে দিশ হেৰাইছিল 108 নৌকা এম্বুলেন্সখনে ।
তাৰপিচত নদীৰ মাজতে বহু সময় ধৰি আৱদ্ধ হৈ পৰিছিল 108 নৌকা এম্বুলেন্সখনে । প্ৰায় 1 ঘণ্টা ধৰি নৈৰ এটি বালিছৰত আৱদ্ধ হৈ পৰিছিল এম্বুলেন্সখন । অৱশ্যে পৰৱৰ্তী সময়ত পাৰঘাট পাবলৈ সক্ষম হয় 108 নৌকা সেৱাখনে । এনেদৰে কুঁৱলী পৰি থাকিলে নিশাৰ ভাগত ৰোগী পাৰাপাৰ কৰাত অসুবিধা হ’ব বুলি কয় 108 নৌকা সেৱাৰ কৰ্মচাৰীয়ে ।

ইফালে দিনৰ ভাগটো ঘন কুঁৱলীৰ বাবে নিমাতীৰ পৰা কমলাবাৰী ঘাটলৈ অহা যাত্ৰীবাহী ফেৰী নদীৰ মাজত আৱদ্ধ হৈ পৰিছিল ।

লগতে পঢ়ক :Bishnu Prasad Rabha : সৈনিক শিল্পী বিষ্ণু প্ৰসাদ ৰাভাক মৃত্যু বাৰ্ষিকীত স্মৰণ