মাজুলী, 13 জুলাই : মাজুলীৰ বিতৰ্কিত ঠিকাদাৰ মুন্নাফ আহমেদৰ বিৰুদ্ধে গড়মূৰ আৰক্ষী থানাত এজাহাৰ (FIR) দাখিল কৰে মাজুলী জিলা প্ৰশাসন (Majuli District Administration)য়ে ৷ ঠিকাদাৰ মুন্নাফ আহমেদে সংঘটিত কৰা অনিময়ৰ বাতৰি প্ৰথমে ইটিভি ভাৰত (ETV Bharat)যোগে সম্প্ৰচাৰ হোৱাৰ পাচতে সৰৱ হৈ উঠিছে জিলা প্ৰশাসন ৷ জিলা উপায়ুক্ত বিক্ৰম কৈৰী (DC Bikram Kairi)ৰ নিৰ্দেশমৰ্মে এগৰাকী দণ্ডাধীশে তদন্ত অব্যাহত ৰাখিছে মুন্নাফৰ বিৰুদ্ধে ৷
জিলাখনত মিনি সচিবালয় নিৰ্মাণৰ বাবদ খৰচ হোৱা 31 কোটি 65 লাখটকীয়া কাম জোৰা-টাপলি মাৰি কৰাৰ লগতে 40 শতাংশ কাম কৰিয়েই কাম বন্ধ কৰি দুবছৰ পেলাই থৈছিল অভিযুক্ত ঠিকাদাৰজনে । দুবাৰকৈ কাম সম্পূৰ্ণৰ সময়সীমা উকলি যোৱাৰ পাচতো কাম বন্ধ কৰি ৰাখিছিল ঠিকাদাৰজনে । সচিবালয়টোৰ দেৱাল আৰু চাদত বৃহৎ ফাট মেলাৰ লগতে নিম্ন মানদণ্ডৰ সামগ্ৰীৰে নিৰ্মাণৰ কাম আগবঢ়োৱা হৈছিল ৷
ঠিকাদাৰৰ বিৰুদ্ধে মাজুলী জিলা প্ৰশাসনৰ এজাহাৰ ইয়াৰোপৰি মাজুলীৰ ৰঙাচাহীত তৃতীয় আৰু চতুৰ্থবৰ্গৰ কৰ্মচাৰী প্ৰশিক্ষণ কেন্দ্ৰটোৰ 12 কোটি 80 লাখ টকাৰ কাম আৰম্ভ নকৰি পেলাই থয় এইজন বিতৰ্কিত ঠিকাদাৰে । লোক নিৰ্মাণ বিভাগ (PWD) আৰু ৰাজনৈতিক নেতাৰ আশিষ ধন্য হৈ ঠিকাদাৰ মুন্নাফ আহমেদে মাজুলীত লুণ্ঠন চলোৱা বুলি জানিব পৰা গৈছে ৷ গুৱাহাটীৰ পৰা মুখ্য অভিযন্তাসহ এটা দল মাজুলীত উপস্থিত হৈ বিতৰ্কিত ঠিকাদাৰজনৰ সমগ্ৰ কাম-কাজৰ অনুসন্ধান আৰম্ভ কৰিছে ।
আনহাতে, বহুকেইজন নিৰ্মাণৰ সামগ্ৰী যোগান ধৰা থলুৱা যুৱকৰ টকা দুবছৰে প্ৰদান কৰা নাই ঠিকাদাৰ মুন্নাফে । যাৰ ফলস্বৰূপে ক্ষোভিত হৈ পৰিছে ভুক্তভোগী যুৱক কেইজনে ৷ মুন্নাফ আহমেদৰ ঘনিষ্ঠ নৃপেন দাস নামৰ লোকজনে অভিযন্তাৰ এটি দলে তদন্ত চলাবলৈ যাওতে ভিডিঅ’ কৰাৰ বাবে কেইবাগৰাকীও ফটো সাংবাদিকক দুৰ্ব্যৱহাৰ কৰাৰো অভিযোগ উত্থাপন হৈছে । গতিকে প্ৰশ্ন হয়, এনে বিতৰ্কিত আৰু দুৰ্নীতিগ্ৰস্ত ঠিকাদাৰৰ বিৰুদ্ধে উচিত তদন্ত হ’বনে?
লগতে পঢ়ক :২৩ কোটিৰ কৰ ফাঁকি : এছ কে চেইলৰ স্বত্বাধিকাৰীক গ্ৰেপ্তাৰ
