মাজুলীত আবাসিক বিদ্যালয় নিৰ্মাণত দুৰ্নীতি সংঘটিত হোৱাৰ অভিযোগ

মাজুলীৰ ৰাওনাপাৰত আবাসিক বিদ্যালয় নিৰ্মাণৰ কামত ব্যাপক দুৰ্নীতি সংঘটিত হোৱাৰ অভিযোগ উত্থাপিত হৈছে । ২০১৯ চনতে আৰম্ভ হৈছিল বিদ্যালয় গৃহ নিৰ্মাণৰ কাম । কিন্তু আজি পৰ্যন্ত ৩০ শতাংশ কামো সম্পূৰ্ণ হোৱা নাই । নিৰ্মাণকাৰ্যৰ ঠিকা লাভ কৰা "মেছাৰ্ছ ষ্টাৰ এণ্টাৰপ্ৰাইজ"ৰ বিৰুদ্ধে ক্ষুদ্ধ হৈ পৰিছে বিভিন্ন দল-সংগঠন ।

মাজুলী, ১১ অক্টোবৰ: মাজুলীত আবাসিক বিদ্যালয়(ল'ৰাৰ) নিৰ্মাণৰ নামত শিক্ষা বিভাগৰ ভেকো ভাওনা । ১,৮০,৯১,৪১৩ টকা আবণ্টন হৈছিল বিদ্যালয় গৃহ নিৰ্মাণৰ নামত । সৰ্ব শিক্ষা মিছনৰ অধীনত ৰাওনাপাৰত আবাসিক বিদ্যালয়(ল'ৰাৰ)খন নিৰ্মাণৰ ঠিকা লাভ কৰিছিল যোৰহাটৰ "মেছাৰ্ছ ষ্টাৰ এণ্টাৰপ্ৰাইজ" নামৰ এটা প্ৰতিষ্ঠানে । প্ৰতিষ্ঠানটোৰ স্বত্বাধিকাৰী সুৰজিত মহন্ত । ২০১৯ চনত বিদ্যালয়ৰ নিৰ্মাণকাৰ্য আৰম্ভ হৈছিল ঠিকেই, কিন্তু পকী খুঁটা পুতিয়েই দায়িত্ব সামৰিলে ঠিকাদাৰে ।

সেয়াও এতিয়া জৰাজীৰ্ণ অৱস্থা হৈছেগৈ । ২২ বিঘা ভূমিত বিদ্যালয়খন নিৰ্মাণৰ সিদ্ধান্ত লোৱা হৈছিল । কিন্তু বিদ্যালয়গৃহ নিৰ্মাণৰ কাম আগবঢ়া নাই । ২০১৯ চনত আৰম্ভ হোৱা কাম কেইটামান খুঁটা পোতাৰ পাছতে কিয় বন্ধ হৈ পৰিল সেয়া ৰহস্যজনক ।

যি খন চৰকাৰে পৰিৱৰ্তন, দুৰ্নীতি মুক্ত অসম গঢ়াৰ কথা কয় সেই চৰকাৰৰ দিনতেই মাজুলীত দুৰ্নীতি বেছি হৈছে বুলি অভিযোগ তুলিছে মাজুলীৰ জাতীয় দল-সংগঠনে ।

লগতে বাহিৰৰ ঠিকাদাৰ বা প্রতিষ্ঠানৰ বাবে মাজুলী খিৰতি গাই হৈ পৰিছে বুলিও তেওঁলোকে মন্তব্য কৰে । এই নিৰ্মাণ কাৰ্যৰে জড়িত প্ৰতিষ্ঠানক আইনৰ আওতালৈ আনি দৃষ্টান্তমূলক শাস্তি বিহিব লাগে আৰু আৰু এই অনুষ্ঠানটো সৰ্বাংগ সুন্দৰ কৰি গঢ়ি তুলিব লাগে বুলি দাবী জনাইছে সংগঠনৰ নেতাই । তেওঁলোকৰ মতে, বিদ্যালয়খনৰ কাম সম্পূৰ্ণ হৈ উঠিলে মাজুলীৰ ছাত্ৰসকল যথেষ্ট উপকৃত হ'ব । ঠিকাদাৰৰ হেমাহিৰ বাবেই বিদ্যালয় গৃহ নিৰ্মাণ কাম বন্ধ হৈ আছে বুলি সংগঠনৰ নেতৃত্বই অভিযোগ তুলিছে ।

লগতে পঢ়ক:গাজিপুৰত অসমৰ কৃষকে পৰিবেশন কৰিলে বাটৰ নাট "অজেয় কৃষক"