মাজুলী, 17 অক্টোবৰ :কাইলৈ অৰ্থাৎ সোমবাৰে ৰাজ্যবাসীয়ে উদযাপন কৰিব অসমীয়াৰ অতিকৈ আপোন কাতি বিহু । দুৰ্গোৎসৱ বিহীন মাজুলীত ব্যাপক প্ৰস্তুতি চলিছে কাতি বিহুকলৈ । মাজুলীৰ আউনীআটী সত্ৰ, দক্ষিণপাট সত্ৰ, গড়মূৰ সত্ৰত ঐতিহ্য পৰম্পৰা ৰক্ষা কৰি আকাশ বন্তি প্ৰজ্বলন কৰিব সোমবাৰে ।
ঐতিহাসিক আউনীআটী সত্ৰত ৩৬৮ বছৰীয়া পৰম্পৰাৰে কাতি বিহু উদযাপনৰ প্ৰস্তুতি ইতিমধ্যে প্ৰায় শেষ হৈছে । উল্লেখ্য যে, সত্ৰৰ প্ৰতিষ্ঠা কালৰে পৰা এই পৰম্পৰা চলি আহিছে মাজুলীত । তাৰ বাবে সত্ৰৰ কীৰ্তন ঘৰৰ নিচেই কাষতে প্ৰজ্বলন কৰিব ২১ যোৰা বন্তি ।
কাতি বিহুক লৈ উথপথপ মাজুলী যদিওবা কাতি বিহু কঙালী বুলি অভিহিত কৰা হয়, তথাপিও সত্ৰ সমূহত এই বিহুৰ আধ্যাত্মিকতা বেছিহে দেখা যায় ।
কাতি মাহটো পূণ্যমাহ আৰু এই কাতি মাহত তুলসী ৰোপন কৰিলে মানৱ জাতিৰ কল্যাণ সাধন হোৱাৰ লগতে ২১ পুৰুষ উদ্বাৰ হয় বুলি লোক বিশ্বাস আছে । ‘‘তুলসী দৰ্শন পাত্ৰে পূণ্য হয়, স্পৰ্শ কৰিলে পাপ ক্ষয় হয়, আৰু তুলসীৰ তলত সকলো তীৰ্থ পোৱা যায় ।’’ এই কথা পদ্ম পুৰাণত উল্লেখ আছে ।
কাতি বিহুৰ বাবে সাজু মাজুলীৰ সত্ৰসমূহ ২১ যোৰা আকাশ বন্তি গোটেই কাতি মাহতে প্ৰজ্বলিত হৈ থাকিব । সোমবাৰে সত্ৰৰ পৰম্পৰা অনুসৰি, গায়ন, বায়ন, ঢোলীয়া, খুলিয়া, ওজাপালি নাইবা সংকীৰ্তন আদিৰ মাজেৰে সত্ৰাধিকাৰে সন্ধিয়া ২১ যোৰ আকাশ বন্তি প্ৰজ্বলন কৰিব । যাৰ বাবে সত্ৰৰ কণ কণ বৈষ্ণৱ সকলেও তুলসী ভেটি নিৰ্মাণত বৰ্তমান ব্যস্ত হৈ পৰিছে ।
দুৰ্গোৎসৱ বিহীন মাজুলীৰ ৰাস, পাল নামৰ লগতে কাতি বিহুক শাৰদীয় উৎসৱ হিচাপে পালন কৰে মাজুলীবাসী ৰাইজে । দামোদৰ মাহ হিচাপে গণ্য কৰা কাতি মাহতো আকাশ বন্তি প্ৰজ্বলিত হৈ থাকিব মাজুলী । সত্ৰ সমূহত পৰম্পৰা ৰক্ষা কৰি সোমবাৰে উদযাপন কৰা হ’ব কাতি বিহু ৷
লগতে পঢ়ক :পৰ্যটন ক্ষেত্ৰলৈ সুখবৰ; পৰ্যটক সোঁত বৈছে কাজিৰঙালৈ
