আজিৰে পৰা ভদীয়া নামেৰে মুখৰিত হ’ব মাজুলী

আজি অৰ্থাৎ মঙলবাৰে আৰম্ভ হ’ল ভদীয়া নাম ৷ তিনি মাহৰ মুৰত মুকলি হ’ল সত্ৰ-নামঘৰৰ দুৱাৰ ৷ খোল-তাল, হৰি নামৰ ধ্বনিৰে মুখৰিত মাজুলী ৷ আজিৰ পৰা চাৰিদিনীয়াকৈ পালন কৰা হৈছে বদলা পদ্ম আতাৰ তিথি ৷

মাজুলী,17 আগষ্ট: উৎফুল্লিত আজি মাজুলীবাসী ৷ পুনৰ যেন মাজুলীলৈ ঘৃৰি আহিছে অতিতৰ সেই দিনবোৰ ৷ খোল-তাল, নাম-প্ৰসংগ, গুৰুজনাৰ হৰি নামৰ ধ্বনিৰে মুখৰিত হৈছে মাজুলীৰ চৌদিশ ৷

মহাপুৰুষ দুজনাৰ স্বৰ্ণিল সংস্কৃতিৰে বৰ্ণিল ঐতিহ্যৰে মুখৰিত হ’ল মাজুলীৰ সত্ৰ নামঘৰ । আজি অৰ্থাৎ মঙলবাৰ হৈছে ভাদ মাহৰ সংক্ৰান্তি । আজিৰ পৰা মাজুলীৰ ৩৫ খন সত্ৰ আৰু তিনি শতাধিক নামঘৰত মাহ যোৰাকৈ ভদীয়া নামৰ কাৰ্যসূচীৰ আৰম্ভণি হৈছে ।

ইফালে পৰম্পৰা ৰক্ষা কৰি নতুন কমলাবাৰী সত্ৰ, উত্তৰ কমলাবাৰী সত্ৰ, ভোগপুৰ সত্ৰ, মধ্য মাজুলী, কমলাবাৰী সত্ৰত চাৰিদিনীয়াকৈ আৰম্ভ হৈছে কমলাবাৰী সত্ৰৰ প্ৰতিষ্ঠাপক গুৰু বদলা পদ্ম আতাৰ তিথি ।

সত্ৰীয়া সংস্কৃতিৰ সমগ্ৰ সম্ভাৰ বিশেষকৈ চৈধ্য প্ৰসংগ, গায়ন বায়ন, চালি নৃত্য, জুমুৰা নৃত্য, কীৰ্তন, ওজাপালি, বিহাৰ নৃত্য মাহজুৰি মুখৰিত হৈ থাকিব মাজুলীৰ সত্ৰ-নামঘৰ । ক’ভিড পৰিস্থিতিৰ বাবে বিগত বৰ্ষত তিথি সমূহত কেৱল আনুষ্ঠানিকতাহে পালন কৰিছিল যদিও এইবাৰ চৰকাৰে কিছু ৰেহাই দিয়াত উলহ মালহেৰে মাহ যোৰাকৈ পালন কৰিছে ভদীয়া নাম ।

হৰি ৰাও, হৰি কীৰ্তন, দেৱ বাদ্যৰ ধ্বনিৰে মুখৰিত হৈছে মাজুলীৰ আকাশ বতাহ ।

লগতে পঢ়ক:আজি ভাদ মাহৰ সংক্ৰান্তি : হৰিনামৰ ধ্বনিৰে মুখৰিত হ’ব ৰাজ্য