Triveni Sangam in Lakhimpur: লখিমপুৰত দেশৰ দ্বিতীয়খন ত্ৰিবেণী সংগম চিনাক্ত

শেহতীয়াকৈ লখিমপুৰ জিলাত চিনাক্ত কৰা হৈছে আন এখন ত্ৰিবেণী সংগম ৷ এই স্থান আছে লখিমপুৰ নগৰৰ পৰা কিছু নিলগৰ অৰুণাচল সীমান্তৱৰ্তী জহিং এলেকাত ৷

লখিমপুৰ, 19 জুলাই:গংগা-যমুনা-সৰস্বতীৰ ত্ৰিবেণী সংগম ভাৰতবৰ্ষৰ ভিতৰতে এক পুণ্য স্থান হিচাপে পৰিগণিত হৈ আহিছে ৷ শেহতীয়াকৈ লখিমপুৰ জিলাতো দেশৰ ধৰ্মীয় পণ্ডিত সকলে চিনাক্ত কৰিছে আন এখন ত্ৰিবেণী সংগম ৷ হিমালয়ৰ পাদদেশত স্কন্ধ পুৰাণত বৰ্ণিত কুমাৰীকা ক্ষেত্ৰৰ ত্ৰিবেণী সংগম এই খনেই বুলি পণ্ডিত সকলে ঠাৱৰ কৰিছে বুলি জানিব পৰা গৈছে ৷

দেশৰ ভিতৰতে অন্যতম পূণ্যভূমিত পৰিণত হোৱাৰ দিশে আগবঢ়িছে লখিমপুৰ ৷ দ্বিতীয়খন ত্ৰিবেণী সংগম চিনাক্ত হৈছে জিলাখনত ৷ দেশৰ বিভিন্ন ধৰ্মীয় পণ্ডিত সকলে ইতিমধ্যে জিলাখনত এই পুণ্য স্থান চিনাক্ত কৰিছে ৷ এই স্থান আছে লখিমপুৰ নগৰৰ পৰা কিছু নিলগৰ অৰুণাচল সীমান্তৱৰ্তী জহিং এলেকাত ৷ জহিং স্থিত ৰাজ্যৰ দ্বিতীয়খন পশু চিকিৎসা বিজ্ঞান মহাবিদ্যালয়ৰ কাষতে জহিং, ৰঙানৈ আৰু ঢেকীয়ানলা নামৰ তিনিখন নৈ একেলগ হৈছে ৷ তিনিখন নৈৰ এই সংগম স্থলক ত্ৰিবেণী সংগম ৰূপে অভিহিত কৰিছে ধৰ্মীয় পণ্ডিত সকলে ৷ তেওঁলোকৰ মতে স্কন্ধ পুৰাণত হিমালয়ৰ পাদদেশত থকা কুমাৰীকা ক্ষেত্ৰত এখন ত্ৰিবেণী সংগম আছে ৷ পুৰাণ বৰ্ণিত কুমাৰীকা ক্ষেত্ৰৰ ত্ৰিবেণী সংগম এইখনেই বুলি পণ্ডিত সকলে ঠাৱৰ কৰিছে ৷

উল্লেখ্য যে, এই তিনি নৈৰ সংগম স্থলক স্থানীয় লোকে অতীজৰ পৰাই পুণ্য স্থান বুলি গণ্য কৰি বিভিন্ন ধৰ্মীয় কাম-কাজত এই স্থানৰ পৰা জলোত্তলন কৰি আহিছে ৷ স্থানীয় লোকে এই সংগম স্থলক স্থানীয় ভাষাত লক্ষী দ বুলি পৰিচিতি দি আহিছে ৷ সস্প্ৰতি ধৰ্মীয় পণ্ডিত সকলে এই লক্ষী দয়েই পুৰাণ বৰ্ণিত কুমাৰীকা ক্ষেত্ৰৰ ত্ৰিবেণী সংগম বুলি চিনাক্ত কৰে ৷

ইতিমধ্যে এই স্থান দৰ্শন কৰি স্নান কৰিবলৈ দেশৰ বিভিন্ন ৰাজ্যৰ পৰা ধৰ্মপ্ৰাণ লোকৰ সমাবেশ ঘটিছে ৷ এই স্থান ধৰ্মীয় পৰ্যটন ক্ষেত্ৰ ৰূপে গঢ়ি তুলিবলৈ এখন সমিতি গঠন কৰি কাম-কাজ আগুৱাই নিয়া হৈছে ৷ ইতিমধ্যে এই স্থানত নব্বৈ ফুট উচ্চতাৰ এডাল ত্ৰিশূল স্থাপন কৰা হৈছে ৷ ত্ৰিবেণী সংগমৰ মূল স্থানক কেন্দ্ৰ কৰি নব্বৈ ফুট উচ্চতাৰ এক বিশাল শিৱ মূৰ্তি স্থাপনৰ কাম আৰম্ভ কৰা হৈছে ৷ প্ৰায় 20 কোটি টকাৰে এই ত্ৰিবেণী সংগমক দেশৰ ভিতৰতে জাকতজিলিকা কৰি তীৰ্থস্থান ৰূপে গঢ়ি তোলাৰ লক্ষ্যৰে কাম আৰম্ভ কৰা হৈছে ৷ এই সন্দৰ্ভত ইতিমধ্যে চৰকাৰৰ সহযোগ কামনা কৰি সমিতিয়ে ৰাজ্যৰ মুখ্যমন্ত্ৰী গৰাকীৰ সৈতেও যোগাযোগ কৰিছে ৷

সমিতিয়ে জনোৱা মতে মুখ্যমন্ত্ৰী গৰাকীয়ে বিষয়টোত আশাব্যঞ্জক সহাৰি জনাইছে ৷ সমিতিয়ে এই সন্দৰ্ভত মুখ্যমন্ত্ৰী গৰাকীৰ সৈতে আলোচনাতো মিলিত হ’ব ৷ সেয়ে হ’লে চৰকাৰী পৃষ্ঠপোষকতা লাভ কৰিলে অচিৰেই লখিমপুৰ জিলাই আন এক পূণ্যভূমি বাহকৰ গৌৰৱেৰে সমগ্ৰ দেশতে এক সুকীয়া পৰিচয় লাভ কৰিব ৷

লগতে পঢ়ক:Assam boy to travel to amarnath riding a bicycle:চাইকেলেৰে পৱিত্ৰধাম অমৰনাথলৈ যাত্ৰা হোজাইৰ ৰাজদীপ ভৌমিকৰ