মেধা সম্পন্ন ছাত্ৰৰ উচ্চশিক্ষাত হেঙাৰ

সদ্যঘোষিত হাইস্কুল শিক্ষান্ত পৰীক্ষাত ভাল ফল দেখুৱাইছে লখিমপুৰৰ বহু ছাত্ৰ-ছাত্ৰীয়ে ৷ কিন্তু ভাল ফলাফলৰ পিছতো চিন্তিত হৈ পৰিছে একাংশ অভিভাৱক আৰু ছাত্ৰ-ছাত্ৰী ৷ তেঁওলোকৰ চিন্তা কেনেদৰে যোগাৰ কৰিব পৰৱৰ্তী শিক্ষাৰ খৰচ । লখিমপুৰৰ বিজয় কৃষ্ণ শইকীয়াৰো একেই অৱস্থা ৷ অভাৱী পৰিয়ালটো চিন্তিত হৈ পৰিছে সন্তানৰ উচ্চ শিক্ষাৰ বাবে ৷

লখিমপুৰ, 7 জুনঃ লখিমপুৰ জিলাৰ হাৰমতীৰ মেলবিলৰ ছাত্ৰ বিজয় কৃষ্ণ শইকীয়া । ৮৬ শতাংশ নম্বৰেৰে হাইস্কুল শিক্ষান্ত পৰীক্ষাত সুখ্যাতি অৰ্জন কৰিছে মেধাৱী ছাত্ৰজনে ৷ বিজয় কৃষ্ণৰ পিতৃ আছিল এজন শিক্ষক, কিন্তু প্ৰাদেশিকৃত বিদ্যালয়ত শিক্ষকতা কৰি ঘৰ চলাব নোৱাৰি চাকৰি এৰি পিতৃ মাধৱ শইকীয়াই পাচলি ব্যৱসায়ী কৰিবলৈ লয় ৷ পাচলি বিক্ৰী কৰি পোৱা উপাৰ্জনেৰে পুত্ৰৰ পঢ়াৰ খৰচ যোগাৰ কৰা মাধৱ শইকীয়া এতিয়া চিন্তিত হৈ পৰিছে পুত্ৰৰ পৰৱৰ্তী শিক্ষাৰ খৰছৰ বাবে ৷ কাৰণ বিজয় কৃষ্ণৰ হেঁপাহ ভবিষ্যতে এজন চিকিৎসক হোৱাৰ । কিন্তু পুত্ৰক পঢ়াৰ খৰচ যোগাৰ দিবলৈ এতিয়া অপাৰগ দৰিদ্ৰ পিতৃ ৷ এই চিন্তাতে এতিয়া সফলতাও ভালদৰে উদযাপন কৰিব পৰা নাই দৰিদ্ৰ পৰিয়ালটোৱে ।পৰিয়ালটোৰ আহ্বান কাৰোবাৰ অকনমান সহায়ে লক্ষ্য পথত উপনীত কৰিব পাৰিব মেধা সম্পন্ন ছাত্ৰজনক ৷

লগতে পঢ়কঃঅনুৰাগীক আচৰিত কৰি ৰাখিব বিচাৰে য়ামী গৌতমে