নাৰায়ণপুৰত ধুমুহাই তচ নচ কৰিলে 'বৰ্ণবিন্যাস' পুথিভঁৰালৰ

সোমবাৰে নাৰায়ণপুৰৰ বিভিন্ন স্থানত হোৱা প্ৰচণ্ড ধুমুহাৰ ফলত বহু কেইটা বাসগৃহৰ লগতে বিশেষকৈ 'আমি আপোনাৰ বাবে' নামৰ স্বেচ্ছাসেৱী সংস্থাটোৱে গঢ় দিয়া 'বৰ্ণবিন্যাস' নামৰ পুথিভঁৰালটোৰো যথেষ্ট অনিষ্ট হয় ৷

বিহপুৰীয়া, 21 এপ্ৰিল : সোমবাৰে নিশা নাৰায়ণপুৰত প্ৰচণ্ড ধুমুহা ৷ ধুমুহাত নাৰায়ণপুৰৰ বিভিন্ন স্থানৰ বহুকেইটা বাসগৃহৰ বিস্তৰ ক্ষতিসাধন হয় ৷ লগতে 'আমি আপোনাৰ বাবে' নামৰ স্বেচ্ছাসেৱী সংস্থাটোৱে গঢ় দিয়া 'বৰ্ণবিন্যাস' নামৰ পুথিভঁৰালটোৰো যথেষ্ট অনিষ্ট হয় ৷ জানিব পৰা মতে, পুথিভঁৰালটোত বিভিন্ন ধৰণৰ গ্ৰন্থৰ উপৰিও ছাত্ৰ-ছাত্ৰীসকলৰ সুবিধাৰ্থে বিভিন্ন প্ৰতিযোগিতামূলক পৰীক্ষাৰ বাবে প্ৰয়োজনীয় কিতাপ সংৰক্ষণ কৰি ৰখা হৈছিল ৷ এই কিতাপসমূহ 'আমি আপোনাৰ বাবে' নামৰ সংস্থাটোৱে সংৰক্ষণ কৰি ৰাখিছিল ৷ সোমবাৰে নিশা অহা ধুমুহাই পুথিভঁৰালটোৰ টিনপাত উৰুৱাই নিয়াৰ ফলত বহু গুৰুত্বপূৰ্ণ গ্ৰন্থ নষ্ট হয় ৷ ৰাইজৰ দান-বৰঙণিৰ সহায়ত অতি কষ্টৰে নিৰ্মাণ কৰা পুথিভঁৰালটোৰ ক্ষতিসাধন হোৱাত উদ্যোক্তাসকল বিমোৰত পৰিছে ৷

নাৰায়ণপুৰৰ প্ৰচণ্ড ধুমুহাত বিস্তৰ ক্ষতিসাধন 'বৰ্ণবিন্যাস' পুথিভঁৰালৰ

উল্লেখ্য যে, স্থানীয় ৰাইজৰ সহযোগত কিছু পৰিমাণে পুথিভঁৰালটো মেৰামতি কৰিছে যদিও অৰ্থৰ অভাৱত পুথিভঁৰালটো পুনৰ নিৰ্মাণ কৰাত যথেষ্ট অসুবিধাৰ সন্মুখীন হয় উদ্যোক্তাসকল ৷ আশাশুধীয়া প্ৰচেষ্টাৰে নিৰ্মাণ কৰা 'বৰ্ণবিন্যাস' পুনৰ নিৰ্মাণৰ বাবে উদ্যোক্তাসকলে চৰকাৰৰ পৰা সাহাৰ্যৰ আহ্বান জনায় ৷

লগতে পঢ়ক : আমগুৰিৰ কেন্দ্ৰীয় ৰঙালী বিহু বাতিল