লখিমপুৰ, 3 জুলাই : কেন্দ্রীয় অসামৰিক বিমান পৰিবহণ বিভাগে দেশৰ লোকচানত চলি থকা বিমান বন্দৰসমূহৰ এখন তালিকা প্ৰস্তুত কৰিছে ৷ এই তালিকাত অসমৰ ছটাকৈ বিমান বন্দৰৰ নাম অন্তর্ভুক্ত হোৱাৰ খবৰে জোকাৰিছে সমগ্ৰ ৰাজ্য ৷ অসমৰ লখিমপুৰৰ লীলাবাৰী, ডিব্ৰুগড়ৰ মোহনবাৰী, কাছাৰৰ কুম্ভীৰগ্ৰাম, যোৰহাটৰ ৰৰৈয়া, তেজপুৰৰ শালনি, আৰু ধুবুৰীৰ ৰূপসী বিমানবন্দৰৰ নাম কেন্দ্রৰ লোকচানত থকা বিমান বন্দৰৰ তালিকাত স্থান পাইছে ।
তথ্য মতে, বিগত তিনিটা বছৰত এই ছটা বিমান বন্দৰৰ লোকচানৰ পৰিমাণ হৈছে 21,776 কোটি টকা । সেই অনুসৰি, লীলাবাৰী বন্দৰত 4,706 কোটি, মোহনবাৰীত 8,009 কোটি, কুম্ভীৰগ্ৰামত 45,59 কোটি, ৰৰৈয়াত 2,109 কোটি, শালনিবাৰীত 1,692 কোটি আৰু ধুবুৰীৰ ৰূপসী বিমান বন্দৰৰ লোকচানৰ পৰিমাণ হ'ল 62 কোটি টকা । এই ছটা বিমান বন্দৰৰ ভিতৰত সৰ্বাধিক মোহনবাৰী বিমান বন্দৰৰ লোকচান দেখুওৱা হৈছে 8,009 কোটি টকা ।
ইতিমধ্যে, কেন্দ্রীয় অসামৰিক বিমান পৰিবহণ বিভাগৰ মন্ত্রী হৰদীপ সিং পুৰীয়ে লোকচানত চলি থকা বিমান বন্দৰসমূহ চৰকাৰে পৰিচালনা কৰিব নোৱাৰে বুলি স্পষ্ট কৰি দিছে । তাৰোপৰি কেন্দ্রীয় তালিকাখনৰ মতে লোকচানত চলা অসমৰ এই ছটা বিমানবন্দৰ ব্যক্তিগত খণ্ডলৈ যোৱাটো অৱধাৰিত হৈ পৰিছে । গুৱাহাটীৰ লোকপ্ৰিয় গোপীনাথ বৰদলৈ আন্তর্জাতিক বিমান বন্দৰটো কেইবছৰমানৰ আগলৈকে লোকচানত চলি আছিল যদিও বিগত দুবছৰ মানৰ পৰা লাভ অৰ্জন কৰিবলৈ সক্ষম হৈছে ।