লখিমপুৰ, 14 এপ্ৰিল :‘‘ব’হাগ মাথো এটি ঋতু নহয়, নহয় ব’হাগ এটি মাহ ৷ অসমীয়া জাতিৰ ই আয়ুসৰেখা, গণ জীৱনৰ সাহ’’ ৷ চাওঁতে চাওঁতে আহি পালেহি হেঁপাহৰ ৰঙালী বিহুটি ৷
আজি গৰু বিহু (Goru Bihu celebrations in Lakhimpur) ৷ বিগত দুটা বছৰে প্ৰতিজন অসমীয়াই অতি উৎসুকতাৰে বাট চাই আহিছিল ৰঙালীৰ বাবে ৷ কিয়নো বিগত সময়চোৱাত কাল কৰ’ণাৰ বাবে হেঁপাহৰ ৰঙালী বিহুটি কোনেও উদযাপন কৰিব পৰা নাছিল ৷ অৱশ্যে এইবাৰ দেখা গ’ল এক বিপৰীত প্ৰতিচ্ছবি ৷
কৰ’ণা মহামাৰীৰ প্ৰকোপ কিছু শাম কটাৰ বাবে ৰাজ্যবাসীয়ে প্ৰাণখুলি উদযাপন কৰিবলৈ লৈছে হেঁপাহৰ বিহুটি (Rangali Bihu celebrates in Assam) ৷ অৱশ্যে ৰঙালী বিহু উদযাপনৰ ক্ষেত্ৰত বতৰে দিছে কিছু বিধি-পথালি । বুধবাৰৰ নিশাৰ পৰা হৈ থকা ধাৰাষাৰ বৰষুণে ৰঙালীৰ উৎসাহ কিছু পৰিমাণে ম্লান কৰি তোলে । তথাপি পৰম্পৰা ৰক্ষা কৰি লখিমপুৰত গৰু বিহু পালনৰ বাবে ওলাই আহে কৃষক ৰাইজ ৷
প্ৰতিকূল বতৰকো নেওচি সমগ্ৰ ৰাজ্যবাসীৰ লগতে লখিমপুৰ জিলাৰ গাঁৱে-ভূঁঞে নদ-নদী, পুখুৰী আৰু জলাশয়ত নামি প্ৰতিগৰাকী কৃষকে হাতে হাতে চাট আৰু মুখত বিহুনাম জুৰি গৰুক গা-ধুওৱা পৰিলক্ষিত হয় । লখিমপুৰৰ কেন্দ্ৰীয় ৰঙালী বিহু সন্মিলনৰ উদ্যোগত আৰু বৃহত্তৰ মহাইজানবাসীৰ সহযোগত সোৱণশিৰি ঘাগৰ নদীৰ পাৰত ৰাজহুৱাকৈ উদযাপন কৰা হৈছে গৰু বিহু ।
লগতে পঢ়ক :পৰম্পৰা ৰক্ষা কৰি মৰাণৰ ৰাইজে পালন কৰিলে গৰু বিহু
