অখিল গগৈৰ মুক্তিৰ দাবীত প্ৰতিবাদ: তাৰ মাজতে ঘটিল অঘটন

কৃষকনেতা অখিল গগৈৰ মুক্তিৰ দাবীৰে লখিমপুৰ জিলাৰ নাৰায়ণপুৰত বৃহস্পতিবাৰে প্ৰতিবাদ সাব্যস্ত কৰিলে কৃষক মুক্তি, লাচিত সেনাৰ লগতে কেইবাটাও সংগঠন আৰু স্থানীয় ৰাইজে ৷ ইতিমধ্যে মুক্তি লাভ কৰিছে কৃষক নেতা বিতু সোণোৱালে ৷ কিন্তু তাৰ মাজতে সেই প্ৰতিবাদস্থলীৰ পৰা স্বয়ং কৃষক নেতাৰ মুখেৰেই প্ৰতিধ্বনিত হ'ল বিতু সোণোৱালক মুক্তি দিয়ক শীৰ্ষক শ্ল'গান ৷

লখিমপুৰ, 23 জুলাই: জামিনত মুক্তি পালে কৃষক নেতা বিতু সোণোৱালে ৷ কিন্তু স্বয়ং কৃষক মুক্তি সংগ্ৰাম সমিতিৰ নেতাই নাজানে তেওঁলোকৰ সংগঠনৰে নেতা গৰাকীৰ মু্ক্তিৰ বিষয়ে ৷ যাৰ বাবে বৃহস্পতিবাৰে নাৰায়ণপুৰত সাব্যস্ত কৰা কৃষক মুক্তিৰ প্ৰতিবাদৰ মাজতে উচ্চ স্বৰত ভাঁহি আহিল কৃষক নেতা বিতু সোণোৱালক মুক্তি দিয়ক শীৰ্ষক শ্ল'গান ৷ বিতু সোণোৱালৰ মুক্তিৰ দাবীৰে প্ৰতিবাদস্থালীৰ পৰা ধ্বনিত হ'ল এগৰাকী কৃষক নেতাৰ প্ৰতিবাদী কণ্ঠ ৷

কৃষক নেতা অখিল গগৈৰ লগতে তেওঁৰ সতীৰ্থ সকলক মুক্তিৰ দাবীৰে নাৰায়ণপুৰত ৰূপায়ণ কৰা প্ৰতিবাদী কাৰ্যসূচীত কৃষক মুক্তি সংগ্ৰাম সমিতি,লাচিত সেনাৰ লগতে ভিন্ন দল-সংগঠন আৰু স্থানীয় ৰাইজে অংশগ্ৰহণ কৰে ৷ নাৰায়ণপুৰ গান্ধী উদ্যানৰ সন্মুখত সংগঠন কেইটাই ৰূপায়ণ কৰিলে এই প্ৰতিবাদী কাৰ্যসূচী ৷ বিজেপি চৰকাৰে অখিল গগৈক মিছা অভিযোগেৰে মাওবাদী সজাই বন্দী কৰি ৰাখিছে বুলি প্ৰতিবাদকাৰী সকলে চৰকাৰৰ বিৰুদ্ধে ক্ষোভ উজাৰিলে প্ৰতিবাদস্থলীৰ পৰা ৷ কংগ্ৰেছৰ দিনতো অনুৰূপ ঘটনাই সংঘটিত হৈছিল অখিল গগৈৰ লগত ৷ বৰ্তমান চৰকাৰকো ফেচীবাদী আখ্যা দি মিছাৰ আশ্ৰয় লৈ অখিল গগৈক দমন কৰিব বিচাৰিছে বুলি মন্তব্য কৰে প্ৰতিবাদকাৰী সকলে ৷ এই সুযোগতে চৰকাৰে অসমৰ ৰাইজৰ ওপৰত CAA, নদী বান্ধ আদি জাপি দি তেল, চাহ, কয়লা আদিকে ধৰি অসমৰ সম্পদসমূহ বিদেশী বহুজাতিক কোম্পানীৰ হাতত গতাই দিব বিচাৰিছে বুলি উল্লেখ কৰে প্ৰতিবাদকাৰী সকলে ৷ চৰকাৰে গণতান্ত্ৰিকভাৱে আন্দোলন কৰা লোকসকলক মিছা দোষেৰে বন্দী কৰি ৰাখিছে ৷ অখিল গগৈৰ দৰে প্ৰতিবাদী সত্বাক বন্দী কৰি ৰখাৰ বাবে আজি সমগ্ৰ অসম জাগি উঠিছে ৷ যেতিয়ালৈকে অখিল গগৈক মুক্তি নিদিয়ে তেতিয়ালৈ অসম শান্ত নহয় বুলিও সকীয়নি প্ৰদান কৰে প্ৰতিবাদকাৰী সকলে ৷

লগতে পঢ়ক:অখিল গগৈৰ মুক্তিৰ দাবীত পূৱ বিলাসীপাৰাত মানৱ-শৃংখল কাৰ্যসূচী