আৰ্থিক দীনতাই বাধা দিব নোৱাৰে ঢকুৱাখনাৰ বিনন্দক !

দৰিদ্ৰ পৰিয়ালৰ সন্তান বিনন্দই সদ্য ঘোষিত হাইস্কুল শিক্ষান্ত পৰীক্ষাত অৱতীৰ্ণ হৈ আটাইকেটা বিষয়ত লেটাৰ নম্বৰসহ ডিষ্টিংশ্যন লাভ কৰিবলৈ সক্ষম হৈছে ৷

ঢকুৱাখনা , 20 মে': শিক্ষা অথবা সফলতাৰ ক্ষেত্ৰত আৰ্থিক দীনতা কেতিয়াও বাধা হ'ব নোৱাৰে ৷ হাইস্কুল শিক্ষান্ত পৰীক্ষাৰ ফলাফলত ইয়াকে পুনৰ প্ৰমাণ কৰি উজলি উঠিল ঢকুৱাখনাৰ উজনি জালভাৰী বিনন্দ প্ৰতিম দত্ত ৷

অতি দৰিদ্ৰ পৰিয়ালৰ সন্তান বিনন্দই শংকৰদেৱ শিশু নিকেতন, ঢকুৱাখনাৰ পৰা এইবাৰৰ হাইস্কুল শিক্ষান্ত পৰীক্ষাত অৱতীৰ্ণ হৈ আটাইকেটা বিষয়ত লেটাৰ নম্বৰসহ ডিষ্টিংশ্যন লাভ কৰি অঞ্চলটোলৈ গৌৰৱ কঢ়িয়াই আনিবলৈ সক্ষম হৈছে ৷ গণিতত 100 শতাংশ নম্বৰ লাভ কৰিবলৈ সক্ষম হোৱা বিনন্দই উচ্চ গণিত বিষয় পঢ়াৰ প্ৰতি আগ্ৰহী আছিল ৷ খেতি কৰি পৰিয়াল পোহপাল দিয়া বিনন্দৰ পিতৃ ডিম্বেশ্বৰ দত্তই আৰ্থিক দীনতাৰ বাবে এটা কেটাৰিং পাৰ্টিত যোগদান কৰিছিল ৷ ইপিনে আৰ্থিক দীনতাৰ বাবে বিনন্দই পঢ়াৰ ক্ষেত্ৰত বহু সমস্যাৰ সন্মুখীন হ'ব লগীয়া হয় ৷ তথাপিও পুত্ৰক উচ্চ শিক্ষাৰে শিক্ষিত কৰি তোলাৰ সপোন পিতৃ ডিম্বেশ্বৰ দত্ত আৰু মাতৃ সোণালী দত্তৰ ৷