নদীবান্ধঃ পুনৰ অশান্ত হ'ব অসম !

প্ৰৱল জনমতক নেওচি আৰম্ভ হ'ল সোৱণশিৰি জলবিদ্য়ুৎ প্ৰকল্পৰ কাম ৷ ৰজ্যজুৰি বিৰোধিতা দল সংগঠনৰ ৷ অথলে গ'ল দল-সংগঠন আৰু জনতাৰ প্ৰতিবাদ ৷ মঙলবাৰে নামনি সোৱণশিৰি জলবিদ্যুৎ প্ৰকল্পৰ কাম আৰম্ভ কৰিলে NHPC কতৃপক্ষই ৷ বান্ধ নিৰ্মানকাৰী NHPC কতৃপক্ষৰ এনে কাৰ্যৰ তীব্ৰ বিৰোধীতা কৰিছে ৰাজ্যৰ বিভিন্ন দল-সংগঠনে ৷

লখিমপুৰ, গুৱাহাটী, 16 অক্টোবৰঃ প্ৰৱল জনমতক আওকাণ কৰি নামনি সোৱণশিৰি জলবিদ্যুৎ প্ৰকল্পৰ কাম আৰম্ভ কৰিলে NHPC কতৃপক্ষই ৷ বৃহৎ নদীবান্ধ বিৰোধী দল-সংগঠনৰ লগতে ৰাইজৰ তীব্ৰ প্ৰতিবাদত সেও মানি 2011 চনৰ 16 ডিচেম্বৰৰ পৰা নামনি সোৱণশিৰি জলবিদ্যুৎ প্ৰকল্পৰ কাম বন্ধ ৰাখিবলৈ বাধ্য হৈছিল NHPC কতৃপক্ষ ৷ ইতিমধ্যে, 50 শতাংশ কাম সম্পূৰ্ণ হোৱা বান্ধটোৰ নিৰ্মাণকাৰ্য দীৰ্ঘ দিন ধৰি বন্ধ হৈ আছিল যদিও অৱশেষত মঙলবাৰৰ পৰা বান্ধৰ কাম পুনৰ আৰম্ভ কৰিলে NHPC কতৃপক্ষই ৷

দল-সংগঠনৰ প্ৰতিবাদ আৰু অসমীয়া ৰাইজৰ আৱেগক ভৰিৰে মোহাৰি নদীবান্ধৰ কাম পুনৰ আৰম্ভ কৰা কাৰ্যৰ বিৰুদ্ধে জাঙুৰ খাই উঠিছে কৃষক মুক্তি সংগ্ৰাম সমিতি ৷ বুধবাৰে বান্ধৰ কাম পুনৰ আৰম্ভ কৰা কাৰ্যৰ বিৰুদ্ধে সৰৱ হৈ পৰে আৰম্ভণিৰে পৰা নামনি সোৱণশিৰি জলবিদ্যুৎ প্ৰকল্পৰ বিৰোধিতা কৰি অহা কৃষক নেতা অখিল গগৈ৷ NHPC কতৃপক্ষই নিজাববীয়াকৈ বান্ধ পুনঃ নিৰ্মাণৰ কাম বন্ধ নকৰিলে প্ৰৱল প্ৰতিৰোধ আন্দোলনৰ জৰিয়তে বান্ধৰ কাম বন্ধ কৰি দিয়া হ'ব বুলি হুংকাৰ প্ৰদান কৰে কৃষক নেতাগৰাকীয়ে৷

ইপিনে NHPC কতৃপক্ষই নামনি সোৱণশিৰি জলবিদ্যুৎ প্ৰকল্পৰ কাম কাম পুনৰ আৰম্ভ কৰা কাৰ্যৰ তীব্ৰ বিৰোধিতা কৰিছে সদৌ অসম জাতীয়তাবাদী যুৱ ছাত্ৰ পৰিষদৰ সাধাৰণ সম্পাদক পলাশ চাংমাইয়ে ৷ দল-সংগঠনৰ লগত কোনোধৰণৰ আলোচনা নকৰাকৈ তথা বিশেষজ্ঞ কমিটিৰ প্ৰতিবেদনক আওকাণ কৰি বান্ধৰ কাম পুনৰ আৰম্ভ কৰা কাৰ্যক কোনো কাৰণতে মানি লোৱা নহ'ব বুলি হুংকাৰ প্ৰদান কৰিছে নেতাগৰাকীয়ে ৷

লখিমপুৰতো নামনি অংশত পৰিব পৰা প্ৰভাৱ সন্দৰ্ভত কোনো ধৰণৰ অধ্যয়ন নকৰাকৈ বান্ধৰ কাম আৰম্ভ কৰা কাৰ্যৰ বিৰুদ্ধে তীব্ৰ প্ৰতিবাদ সাব্যস্ত কৰিলে অসম জাতীয়তাবাদী যুৱ ছাত্ৰ পৰিষদে৷ অতি সোনকালে নামনি সোৱণশিৰি জলবিদ্যুৎ প্ৰকল্পৰ কাম বন্ধ নকৰিলে হাতত অস্ত্ৰ তুলি হোৱাৰ হুংকাৰ দিয়ে সংগঠনটোৰ লখিমপুৰ জিলা সমিতিয়ে ৷