ঘৰলৈ উভতি আহিল পূৰ্ণিমা

মাতৃৰ উমাল সান্নিধ্যত সুখী কণমানি কন্যা

লখিমপুৰ,১মাৰ্চ: বছৰে সন্ধানহীন হৈ থকাৰ পাচত শুকুৰবাৰে আপোন মানুহবোৰৰ কাষত পূৰ্ণিমা কামান নামৰ এইগৰাকী মহিলা। লখিমপুৰৰ বগীনদীৰ মহিলাগৰাকীয়ে প্ৰায় এবছৰ পূৰ্বে বজাৰলৈ বুলি ওলাই গৈ ভুলবশতঃ যোৰহাটত উপস্থিত হৈছিল।

তাৰ পাচতে মহিলাগৰাকীৰ সন্ধানত হাহাকাৰ কৰিবলগীয়া হৈছিল স্বামী লিপিন উক্ৰাঙে। মাতৃহাৰা হৈ নিঠৰুৱা হৈ পৰিছিল কণমানিজনীও।কিন্তু অৱশেষত আহিল ভাল খবৰ। লখিমপুৰ আৰু যোৰহাট জিলা আইন সেৱা প্ৰাধিকাৰীৰ ততপৰতাত এবছৰ পাচত পূৰ্ণিমা আহিল আপোন ঘৰখনলৈ। স্বামী আৰু কন্যাক কাষত পাই আৱেগিক মহিলাগৰাকী।যোৰহাটৰ এটা আশ্ৰয়গৃহত থকা পূৰ্ণিমা কামানৰ শুকুৰবাৰে মহামিলন ঘটে নিজ পৰিয়ালটোৰ সৈতে। এইক্ষেত্ৰত দুয়োখন জিলাৰ আইন সেৱা প্ৰাধিকাৰীৰ লগতে আশ্ৰয় গৃহটোৰ কৰ্মচাৰী আৰু বগীনদী আৰক্ষীয়ে গ্ৰবহণ কৰে বিশেষ ভূমিকা।

উল্লেখ্য যে অসুস্থ পূৰ্ণিমাৰ চিকিৎসাৰ দায়িত্ব লৈছে লখিমপুৰ জিলা আইন সেৱা প্ৰাধিকাৰীয়ে । লগতে পৰিয়ালটোৰ একমাত্ৰ কন্যা ৭ বছৰীয়া কনমাণিজনীৰো পঢ়াৰ ব্যৱস্থা গ্ৰহণ কৰাৰ আশ্বাস দিছে বিষয়াগৰাকীয়ে ।