লখিমপুৰ, 21 এপ্ৰিলঃনিৰ্জন ৰাজপথৰ দাতিত গ্ৰাহকৰ বাবে অপেক্ষাৰত এটি কণমানি। সমুখত কেইটামান পানীলাও,বিলাহী আৰু কেইমুঠিমান ধনীয়া । তাইৰ লক্ষ্য গ্ৰাহক। কাৰণ গ্ৰাহক আহিলে বিক্ৰী হ'ব পাচলি,নিশালৈ পৰিয়ালটোৱে যোগাৰ কৰিব পাৰিব এমুঠি চাউল । কণমানি জনীৰ নাম জেচমিনা, ঘৰ লখিমপুৰ জিলাৰ এঙাৰখোৱাৰ নৈ গুৰিত । লক ডাউনৰ বাবে কণমানিজনিৰ পৰিয়ালটো পৰিছে সমস্যাত। নাটনি হৈছে এমুঠি খাদ্যৰ। মাতৃৰ কথাত ৰাস্তাৰ কাষতেই সমুখত পাচলিৰ টোপোলা লৈ তাই বহিছে গ্ৰাহকৰ বাবে ।
জীৱনৰ বাস্তৱতাই মোহাৰি দিয়া এগৰাকী কণমানিৰ কথা কিন্তু কি হ'ব, আগৰ দৰে মানুহৰ আহ যাহো নাই এতিয়া, দুই এক গৈছে যদিও সেয়া আৰক্ষী বা জৰুৰীকালীন সেৱাৰ মানুহ ৷ উভতি চাবলৈ সময় নাই ৷ তাই নাজানে লক ডাউনৰ অৰ্থ কি, নাজানে কৰ'ণা ভাইৰাছৰ ভয়াৱহতা। মুখত এখন মাস্ক পৰিধান কৰি নিৰ্জন ৰাজপথত অপেক্ষা কৰিছে গ্ৰাহকৰ। পেচাত পিতৃ এজন অটো চালক,কিন্তু লক ডাউনত নাই উপাৰ্জন। চলাব পৰা নাই ঘৰ। কণমানি জনীৰ পৰিয়ালটো বঞ্চিত হৈছে চৰকাৰী সাহাৰ্যৰ পৰা। কাৰোবাৰ বাবে লক ডাউন উপহাস যদিও কাৰোবাৰ বাবে হৈ পৰিছে অভিশাপ। লখিমপুৰৰ ৰাজপথত এইজনী কণমানিয়ে নিজৰ আৰু পৰিয়ালৰ ভোক নিবাৰণৰ বাবে ৰাজপথত অপেক্ষা কৰিছে এজন মূল্যৱান গ্ৰাহকলৈ ৷ কোনোবা আহিব আৰু তাইৰ অভাৱ পূৰণ কৰিব পৰাকৈ পাচলি কেইটা লৈ যাব কেইটামান টকা তাইৰ হাতত গুজি...বাস্তৱ সত্য ৷
