বিহপুৰীয়া, 11 ডিচেম্বৰ: ভূপালত অনুষ্ঠিত 64 সংখ্যক ৰাষ্ট্ৰীয় শ্বুটিং চেম্পিয়নশ্বিপ(64th National Shooting Championship Bhopal)ত আন্তঃৰাষ্ট্ৰীয় খ্যাতি সম্পন্ন যুৱ শ্বুটাৰ হৃদয় হাজৰিকাই চিনিয়ৰ শাখাত ব্ৰঞ্জৰ পদক দখল কৰে ৷
যোগ্যতা অৰ্জনৰ মেচখনত হৃদয়ে 628.6 পইন্ট লাভ কৰি ফাইনেলত প্ৰৱেশ কৰিছিল ৷ চূড়ান্ত খেলত হৃদয় হাজৰিকাই এটা শ্বটত 9.1 পইন্ট লাভ কৰাত স্বৰ্ণ পদক লাভৰ পৰা বঞ্চিত হয় যদিও চিনিয়ৰ পৰ্যায়ত প্ৰথম পদক লাভ কৰিবলৈ সক্ষম হয় ৷
ক’ভিড-19ৰ বাবে এক দীঘলীয়া সময় বিৰতি ল’বলগীয়া হোৱাৰ পিছত অসমৰ শ্বুটাৰ হৃদয় হাজৰিকাৰ এয়া প্ৰথম পদক ৷ ইয়াৰ পূৰ্বে 2020 চনত গুৱাহাটীত অনুষ্ঠিত খেল’ ইণ্ডিয়াৰ য়ুথ গেমচত ৰূপৰ পদক লাভ কৰি হৃদয়ে গৃহ চহৰ নাৰায়ণপুৰৰ লগতে সমগ্ৰ লখিমপুৰ জিলালৈ গৌৰৱ কঢ়িয়াই আনিছিল ।
উল্লেখ্য যে, ২০১৮ চনত অনুষ্ঠিত ইণ্টাৰলেশ্যনেল শ্বুটিং স্পৰ্ট ফেডাৰেশ্যনৰ (International Shooting Sport Federation) বিশ্ব শ্বুটিঙৰ 10 মিটাৰ এয়াৰ ৰাইফল ইভেন্টত স্বৰ্ণপদক লাভ কৰিছিল অসম সন্তান হৃদয় হাজৰিকাই ৷
লগতে পঢ়ক:Maradona's Watch found in Sivsagar : শিৱসাগৰত উদ্ধাৰ ফুটবল সম্ৰাট মাৰাডোনাৰ ঘড়ী
