বিহপুৰীয়া, 14 ডিচেম্বৰ : কৃষি বিলৰ বিৰুদ্ধে কৃষকৰ আন্দোলন অব্যাহত আছে ৷ পাঞ্জাৱ-হাৰিয়ানা আৰু উত্তৰ প্ৰদেশৰ কৃষক সকলে দিল্লী সীমান্তত ৰাষ্ট্ৰীয় ঘাইপথ অৱৰোধ কৰি প্ৰতিবাদত বহি পৰিছে ৷ কেন্দ্ৰ চৰকাৰৰ সকলো প্ৰস্তাৱক কৃষক সকলে খাৰিজ কৰিছে ৷ ইয়াৰোপৰিও এই সময়ছোৱাত কেন্দ্ৰ চৰকাৰৰে কৃষকৰ কেইবালানিও আলোচনা হোৱাৰ পাচতো সিদ্ধান্তত উপনীত নহ'ল ৷
ইয়াৰ মাজতে অসমতো আন্দোলনত নামি কৰিছে শতাধিক কৃষক ৷ কৃষকৰ ধান চৰকাৰে বান্ধি দিয়া ন্যূনতম সমৰ্থন মূল্যত ক্ৰয় কৰাৰ দাবীত নাৰায়ণপুৰত সোমবাৰে প্ৰতিবাদ সাব্যস্ত কৰে শতাধিক কৃষকে । প্ৰতিবাদকাৰীসকলে নাৰায়ণপুৰ ৰাজহ চক্ৰৰ চক্ৰ বিষয়া কাৰ্যালয়ত উপস্থিত হৈ চক্ৰ বিষয়াৰ জৰিয়তে অসমৰ ৰাজ্যপাল আৰু দেশৰ প্ৰধানমন্ত্ৰীলৈ স্মাৰক পত্ৰও প্ৰেৰণ কৰে ।