লখিমপুৰত আটক 3 ড্ৰাগছ সৰবৰাহকাৰী: উৎখাত বৃহৎ ড্ৰাগছৰ ঘাটি

লখিমপুৰ আৰক্ষীৰ অভিযানত উৎখাত ড্ৰাগছৰ ঘাটি ৷ আৰক্ষীৰ অভিযানত আটক তিনি ড্ৰাগছ সৰবৰাহকাৰী

লখিমপুৰ, 17 অক্টোবৰ: গোপন খবৰৰ ভিত্তিত লখিমপুৰ আৰক্ষীয়ে বৃহস্পতিবাৰে চলোৱা অভিযানত আটক কৰে 3 ড্ৰাগছ ব্যৱসায়ীক ৷ আটকাধীন ড্ৰাগছ ব্যৱসায়ী কেইজন ক্ৰমে ৰিজু নন্দি,মুকুন্দ দাস আৰু অসীম গগৈ। আটকাধীন যুৱক কেইজনৰ পৰা আৰক্ষীয়ে ৪৪.৬২ গ্ৰাম হেৰ'ইন,নগদ ১লাখ ৬২হাজাৰ টকা আৰু এটা হাতীৰ দাঁত উদ্ধাৰ কৰে।

উল্লেখযোগ্য যে,লখিমপুৰ জিলাৰ উপ আৰক্ষী অধীক্ষক ৰুণা নেওঁগৰ নেতৃত্বত চলিছিল এই অভিযান। আৰক্ষীয়ে ড্ৰাগছ সৰবৰাহকাৰীক সোধা পোচা অব্যাহত ৰখাৰ লগতে উদ্ধাৰ হোৱা হাতীৰ দাঁত সম্পৰ্কতো তদন্ত অব্যাহত ৰাখিছে ৷ সন্দেহ কৰা হৈছে জন্তুৰ দাঁত,ছালৰ চোৰাং ব্যৱসায়ত জড়িত আটকাধীন যুৱক কেইজন। অধিক তথ্যৰ বাবে আৰক্ষীয়ে দলটোক জেৰা অব্যাহত ৰাখিছে ৷