বেলগুৰি সত্ৰৰ সত্ৰাধিকাৰক ক্ষমা বিচাৰিলে বিজেপি কৰ্মীয়ে

দুদিন পূৰ্বে লখিমপুৰ জিলাৰ নাৰায়ণপুৰৰ ঐতিহাসিক শ্ৰীশ্ৰী বেলগুৰি সত্ৰৰ সত্ৰাধিকাৰ মুনীন্দ্ৰ নাৰায়ণ মহন্তক অপদস্থ কৰিছিল একাংশ বিজেপি নেতাই ৷ উক্ত কাণ্ডই বৰ্তমান সূত্ৰপাত ঘটাইছে বিতৰ্কৰ ৷ এই বিতৰ্কৰ মাজতে বুধবাৰে সত্ৰত প্ৰৱেশ কৰি সত্ৰাধিকাৰক কৰা অপমানৰ দোষ স্বীকাৰ কৰি আঁঠু কাঢ়ি ক্ষমা বিচাৰে বিজেপি নেতা কেইগৰাকীয়ে ৷

বিহপুৰীয়া,5 আগষ্ট: বিগত দুদিন পূৰ্বে লখিমপুৰ জিলাৰ নাৰায়ণপুৰৰ ঐতিহাসিক শ্ৰীশ্ৰী বেলগুৰি সত্ৰৰ সত্ৰাধিকাৰ মুনীন্দ্ৰ নাৰায়ণ মহন্তক অপদস্থ কৰিছিল একাংশ বিজেপি নেতাই ৷ এই অভিযোগ উত্থাপন কৰিছিল খোদ সত্ৰাধিকাৰ গৰাকীয়ে ৷ আনকি, সত্ৰাধিকাৰগৰাকীক ব্যক্তিগতভাৱেও অপদস্থ কৰিছিল বিজেপিৰ নেতাসকলে ৷ উক্ত কাণ্ডই বৰ্তমান সূত্ৰপাত ঘটাইছে বিতৰ্কৰ ৷ সত্ৰাধিকাৰ গৰাকীক বিজেপি নেতাই কৰা অপমানৰ ঘটনা সংঘটিত হৈছিল সোমবাৰে বিয়লিৰ ভাগত ৷ উল্লেখ্য যে, সত্ৰৰ কাম-কাজ পৰিচালনা কৰাৰ দায়িত্বত থকা জিলা পৰিষদৰ সদস্য ভাস্কৰ হাজৰিকা সহ পাঁচগৰাকী ব্যক্তিৰ বিৰুদ্ধে উত্থাপিত হৈছিল এই অভিযোগ ৷

উক্ত ঘটনাক কেন্দ্ৰ কৰি জিলাখনৰ বিহপুৰীয়াৰ বিধায়ক দেবানন্দ হাজৰিকাৰ একান্ত ঘনিষ্ঠ তথা জিলা পৰিষদৰ সদস্য ভাস্কৰ হাজৰিকাৰ প্ৰতিকৃতি দাহ কৰি ঘটনা সম্পৰ্কত তদন্তৰ দাবী কৰে জিলাখনৰ কংগ্ৰেছ কৰ্মীসকলে ৷ এই বিতৰ্কৰ মাজতে বুধবাৰে সত্ৰত প্ৰৱেশ কৰি সত্ৰাধিকাৰক কৰা অপমানৰ দোষ স্বীকাৰ কৰি আঁঠু কাঢ়ি ক্ষমা বিচাৰে ভাস্কৰ হাজৰিকা, সুনীল হাজৰিকা, তপন চেকনীধৰা, প্ৰাঞ্জল বৰা আৰু বুঢ়াভকত নিত্যানন্দ শইকীয়াই ৷

লগতে চাওকঃবিজেপি কৰ্মীৰ অতপালিত অতিষ্ঠ বেলগুৰি সত্ৰৰ সত্ৰাধিকাৰ