বিহপুৰীয়া, ২১ ডিচেম্বৰ: খোল-তালৰ শব্দ, গীত-ভটিমাৰ অমিয়া সুৰেৰে মুখৰিত হৈ পৰিব লখিমপুৰৰ লেটেকুপুখুৰী । মহাপুৰুষ শ্ৰী শ্ৰী মাধৱদেৱৰ জন্মস্থান লেটেকুপুখুৰীত ৩ দিনীয়া কাৰ্যসূচীৰে অনুষ্ঠিত কৰা হ'ব অংকীয়া ভাওনা সমাৰোহ । ৩ দিনীয়া কাৰ্যসূচীৰে অনুষ্ঠিত হ'বলগীয়া এই সমাৰোহত দুয়োজনা গুৰুৰ ১২ খন অংকীয়া নাট প্ৰদৰ্শন কৰা হ'ব । সোমবাৰে এক সংবাদমেল সম্বোধন কৰি এই কথা প্ৰকাশ কৰে আদৰণি সমিতিয়ে । সংবাদমেলত নতুন কমলাবাৰী সত্ৰৰ সত্ৰাধিকাৰ জনাৰ্দন দেৱ গোস্বামীয়ে কয় যে, লকডাউনৰ সময়ত শিল্পী তথা ভাওনাৰ লগত বিভিন্ন ধৰণে জড়িত হৈ থকা লোকসকলৰ জীৱন আৰু কাম-কাজ এক প্ৰকাৰ স্থবিৰ হৈ পৰিছিল । এইসকল লোকক প্ৰেৰণা যোগোৱাৰ উদ্দেশ্যে এই ভাওনা সমাৰোহৰ আয়োজন কৰা হৈছে ।
এই সমাৰোহত প্ৰায় ৬০০ গৰাকী শিল্পীয়ে নিজৰ প্ৰতিভা প্ৰদৰ্শনৰ এখন মঞ্চ পাব । লগতে ভাৱৰীয়া পোছাক তৈয়াৰ কৰা লোকসকলেও ব্যৱসায়িক ক্ষেত্ৰত উপকৃত হ'ব বুলি মন্তব্য কৰে সত্ৰাধিকাৰগৰাকীয়ে । তিনিদিনীয়া সমাৰোহত আলোচনা চক্ৰ, স্মৃতিগ্ৰন্থ প্ৰকাশৰো ব্যৱস্থা কৰিছে আদৰণি সমিতিয়ে ।