লখিমপুৰ, ৭ ডিচেম্বৰ: লখিমপুৰ জিলাক যুগান্তকাৰী পৰিৱৰ্তনৰ দিশে আগুৱাই নিছে অসম মালা আঁচনিয়ে(Assam Mala Scheme) । এসময়ত কলীয়াপানী আখ্যা পোৱা দুৰ্গম লখিমপুৰ জিলা আছিল চৰকাৰী কৰ্মচাৰীৰ শাস্তিমূলক বদলিৰ স্থান । কালক্ৰমত উন্নয়নৰ পৰশ পোৱা লখিমপুৰ জিলা তেনে অপযশৰ পৰা বহুলাংশে মুক্তি পালেও এতিয়াও বহু অঞ্চললৈ যাতায়ত ব্যৱস্থা দুৰ্গম হৈয়েই আছে । আনহে নালাগে জিলাখনৰ দ্বিতীয়খন মহকুমা ঢকুৱাখনালৈ পোনপটীয়া সংযোগ ব্যৱস্থা অতি দুৰ্গম । মাজত থকা ঐতিহাসিক ঘুনাসুতিৰ সংযোগ ব্যৱস্থাও তথৈবচ ৷ দুই তিনিটা ঘাট নাৱেৰে পাৰ হোৱাৰ পাছতহে ঘুনাসুতিত ভৰি থ’ব পাৰি ।
ঘুনাসুতি সংযোগী দলঙৰ ভূমি পূজনক লৈ আনন্দিত লখিমপুৰবাসী তেনেদৰে মাজত মাথো ব্ৰহ্মপুত্ৰ নদীয়ে পৃথক কৰি ৰখা লখিমপুৰৰ সমীপৰ মাজুলী জিলালৈ সংযোগ ব্যবস্থাও অতি কষ্টদায়ক । কেইবাটাও ঘাট পাৰ হৈ হে মাজুলী লৈ যাব পাৰি । পিছে যাতায়তৰ ক্ষেত্রৰ এনে চৰম দুৰৱস্থা অচিৰেই ওৰ পৰিব । কিয়নো অসম মালা আঁচনিয়ে জিলাখনৰ পৰা ঢকুৱাখনা অথবা দাঁতি কাষৰীয়া জিলা মাজুলীলৈ যাতায়ত ব্যৱস্থা সুচল কৰাৰ দিশে আগুৱাই নিছে । সোৱণশিৰি নদীৰ ওপৰত নিৰ্মাণ কৰিবলৈ লোৱা ৫৫৩ কোটি টকীয়া দলঙখনে ঘুনাসুতি, ঢকুৱাখনাৰ পৰা মাজুলীলৈ পোনপটীয়া সংযোগ কৰিব ।
১৮ ডিচেম্বৰত হ’ব ঘুনাসুতি সংযোগী দলঙৰ ভূমি পূজন আনহাতে অসম মালা আঁচনিৰ অধীনতে ২০২০-২০২১ বৰ্ষৰ অনুদানেৰে চেলেক-ধুনাগুৰিত ক্ৰমে ১.৩০ কিলোমিটাৰ আৰু চাৰিশ মিটাৰ দৈৰ্ঘৰ দুখন দলং নিৰ্মাণকাৰ্য আৰম্ভ হৈছে । এই দুখন দলঙে লখিমপুৰৰ পৰা মাজুলীক পোনপটীয়াকৈ সংযোগ কৰিব । ঘুনাসুতি সংযোগী দলঙৰ ভূমি পূজনেৰে অহা ১৮ ডিচেম্বৰত নিৰ্মাণকাৰ্যৰ শুভাৰম্ভ কৰিব মুখ্যমন্ত্রী ড৹ হিমন্ত বিশ্ব শৰ্মাই । মুখ্যমন্ত্রীগৰাকীয়ে সেইদিনাই নৱনিৰ্মিত বাইপাচটো মুকলি কৰাৰ উপৰি নগৰ এলেকাৰ নকাড়ী ৰেলৱে ক্ৰচিঙত এখন উৰণীয়া সেতুৰো আধাৰশিলা স্থাপন কৰিব(Three projects in Lakhimpur) ।
১৮ ডিচেম্বৰত হ’ব ঘুনাসুতি সংযোগী দলঙৰ ভূমি পূজন অসম মালা আঁচনিৰ অধীনত নিৰ্মাণ কৰিবলৈ লোৱা এই দলংকেইখনে কেৱল ঢকুৱাখনা, ঘুনাসুতি অথবা মাজুলীক পোনপটীয়াকৈ সংযোগ কৰাৰ উপৰি সেইপথৰ দাঁতিকাষৰীয়া অঞ্চলসমূহৰ উন্নয়নটো গুৰুত্বপূর্ণ ভূমিকা ল’ব । যাৰ বাবে লখিমপুৰ জিলাৰ যাতায়াত ব্যৱস্থা অথবা উন্নয়নৰ দিশত যুগান্তকাৰী পৰিৱৰ্তন সাধন হ’ব । স্বাধীনতাৰ পাছৰে পৰা ৰাইজৰ দাবী স্বত্বেও কোনোদিনে নিৰ্মাণ নকৰা এই দলংকেইখন জিলাখনৰ বাবে আশীর্বাদ স্বৰূপ হৈ উঠিব । এনে সম্ভাৱনা দেখি ৰাইজে এতিয়া অসম মালা আঁচনি লখিমপুৰৰ বাবে আশীর্বাদ হ’ব বুলি মন্তব্য কৰিছে ।
লগতে পঢ়ক: School Education Department : ৰাজ্যৰ 196 বিদ্যালয়লৈ অত্যাধুনিক কেলকুলেটৰ বিতৰণ শিক্ষা বিভাগৰ
