বিদ্যুৎ নিয়মীয়াকৰণৰ দাবীৰে নাওবৈচাত অসমীয়া যুৱ মঞ্চৰ প্ৰতিবাদ

বিদ্যুতৰ লুকা ভাকুত অতিস্থ হৈ ৰাজপথলৈ ওলাই আহিল অসমীয়া যুৱ মঞ্চৰ লখিমপুৰ জিলা সমিতিৰ সদস্য সকল । নাওবৈচাত শক্তি বিভাগৰ বিৰুদ্ধে প্ৰতিবাদত নমা অসমীয়া যুৱ মঞ্চৰ সদস্য সকলে শীঘ্ৰে বিদ্যুতৰ যোগান নিয়মীয়া কৰিবলৈ দাবী উত্থাপন কৰিলে । অন্যথা বিদ্যুতৰ বিল বৰ্জনৰ লগতে বিভাগটোৰ বিৰুদ্ধে আন্দোলন অধিক শক্তিশালী কৰাৰ হুংকাৰ দিলে সংগঠনটোৰ প্ৰতিবাদী সদস্য সকলে ।

নাওবৈচা, ৫ আগষ্ট: লখিমপুৰ জিলাৰ নাওবৈচাৰ বিদ্যুৎ উপ-সংমণ্ডৰ কাৰ্যালয়ৰ সন্মুখত বিভাগটোৰ বিৰুদ্ধে বুধবাৰে অসমীয়া যুৱ মঞ্চৰ দলহাট-ফুলবাৰী আঞ্চলিক সমিতিৰ সহযোগত স্থানীয় ৰাইজে কৰিলে প্ৰতিবাদ ৷ বিদ্যুৎ নিয়মীয়াকৰণৰ দাবীৰে হাতে-হাতে প্লে'কাৰ্ড লৈ শক্তি বিভাগৰ বিৰুদ্ধে সাব্যস্ত কৰে এই প্ৰতিবাদ ৷

প্ৰতিবাদকাৰী সকলে শক্তি বিভাগ গ' বেক, বিদ্যুৎ যোগান নিয়মীয়া কৰক, যোগান নিয়মীয়া নহ'লে বিল দিয়া নহ'ব, দলহাট-ফুলবাৰীত অতিৰিক্ত চাব-ষ্টেচন স্থাপনৰ ব্যৱস্থা কৰক, বিভাগৰ কৰ্মচাৰীৰ ভুৱা আশ্বাস বন্ধ কৰক আদি ধ্বনিৰে উত্তাল কৰি তোলে নাওবৈচাৰ বিদ্যুৎ উপ-সংমণ্ডলৰ কাৰ্যালয় চৌহদৰ লগতে চৌদিশৰ পৰিৱেশ ।

সামান্য এজাক বতাহ বৰষুণতেই বিজুলী কৰ্তন কৰা, দিনটোৰ ২৪ ঘণ্টাৰ ভিতৰত মাত্ৰ ৪ ঘণ্টাৰ বিদ্যুৎ যোগান ধৰা, বিভাগটোৰ নিয়ন্ত্ৰণ কক্ষৰ জৰুৰী কালিন ফোন নম্বৰটো ব্যস্ত অথবা বিকল কৰি ৰখা আদি অভিযোগেৰে বিভাগটোৰ বিৰুদ্ধে ক্ষোভ ব্যক্ত কৰে প্ৰতিবাদকাৰী সকলে ।

বিদ্যুতৰ নিয়মীয়াকৰণৰ দাবীৰে নাওবৈচাত অসমীয়া যুৱ মঞ্চৰ প্ৰতিবাদ

অনিয়মী বিদ্যুৎ যোগান আঁতৰ কৰি অঞ্চলটোত শীঘ্ৰে বিদ্যুতৰ যোগান নিয়মীয়া নকৰিলে শক্তি বিভাগৰ বিৰুদ্ধে অধিক শক্তিশালী ৰূপত আন্দোলন গঢ়ি তোলাৰ হুংকাৰ দিলে অসমীয়া যুৱ মঞ্চৰ প্ৰতিবাদী সদস্য সকলে । লগতে বিদ্যুতৰ বিল বৰ্জন আৰু শক্তি বিভাগৰ কৰ্মচাৰী সকলক আবদ্ধ কৰি ৰখাৰ হুংকাৰ দিলে প্ৰতিবাদকাৰী সকলে ।