Flood in Lakhimpur : যিকোনো মূহুৰ্ততে ছিগিব পাৰে লখিমপুৰৰ ৰঙানদীৰ ৩৬২ কোটি টকীয়া মথাউৰি

বছৰৰ প্ৰথমটো বানত লখিমপুৰ ৷ বুধবাৰে মথাউৰি ছিগি শিঙৰা নৈৰ পানীয়ে সৃষ্টি কৰিছে জল প্লাৱনৰ । আনকি ৰঙানদীৰ জলপৃষ্ঠ বৃদ্ধি পোৱাৰ সম্ভাৱনা প্ৰকট হৈ পৰিছে ৷ কিয়নো ৰঙানদীয়ে বিগত বৰ্ষতে ভাবুকি কঢ়িয়াই অনা কোটি টকীয়া মথাউৰিটোৰ বিভিন্ন অংশসমূহত শক্তিশালী প্ৰতিৰোধ ব্যৱস্থা লোৱাৰ সলনি জলসম্পদ বিভাগে কেৱল বাঁহৰ গোজ পুঁতিয়েই দায়িত্ব সামৰাৰ অভিযোগ উত্থাপন হৈছে ।

লখিমপুৰ, ১৫ জুন :বাৰিষা আৰম্ভ হোৱাৰ লগে লগে লখিমপুৰত আৰম্ভ হৈছে বানৰ সংহাৰ ৷ ইতিমধ্যে ইখনৰ পাচত সিখন গাঁও জলমগ্ন হৈ পৰিছে ৷ ছিগিছে শিঙৰা নৈৰ মথাউৰি ৷ বুধবাৰে দুপৰীয়াৰ ভাগত নদীখনে ১৫ নং ৰাষ্ট্ৰীয় ঘাইপথৰ পৰা দ’লহাট বজাৰ সংযোগী পথৰ কাষত মথাউৰিটো শলমৰীয়াৰ সমীপত প্ৰায় 40 মিটাৰ ছিগি পোন্ধৰখনতকৈয়ো অধিক গাঁও বুৰাই পেলাইছে ৷ যাক লৈ শংকিত হৈ পৰিছে এতিয়া লখিমপুৰবাসী ৰাইজ ৷

ইফালে জলসম্পদ বিভাগৰ কিছু আজৱকাণ্ডই এতিয়া চকু কঁপালত তুলিছে সাধাৰণ ৰাইজৰ ৷ কিয়নো শিঙৰা নৈৰ মথাউৰি ছিগাৰ পাচত এতিয়া ক্ৰমাৎ বৃদ্ধি পাইছে লখিমপুৰৰ ৰঙানদীৰ জলপৃষ্ঠ ৷ যদিহে ৰঙানদী উফন্দি উঠে, তেতিয়া হয়তো সমগ্ৰ লখিমপুৰ জিলাখনে বানৰ কৱলত পৰিব ৷ কিয়নো ৰঙানদীৰ বাওদিশে থকা ৩৬২ কোটি টকীয়া মথাউৰিটো মাত্ৰ নামতহে আছে ৷ এই অভিযোগ উত্থাপন কৰিছে AJYPৰ লখিমপুৰ আঞ্চলিকৰ সভাপতি মনোজ কলিতাই ৷

লখিমপুৰত আৰম্ভ হৈছে বানৰ সংহাৰ

মনোজ কলিতাই উল্লেখ কৰা অনুসৰি, ৰঙানদীৰ বাওদিশে থকা মথাউৰিটোত মাত্ৰ বাঁহৰ কেইটামান গোজ পুঁতিয়েই দায়িত্ব সামৰিছে জলসম্পদ বিভাগে ৷ লখিমপুৰ নগৰৰৰ সুৰক্ষা কবচ স্বৰূপে থকা এই মথাউৰিটোৰ কেইবাটাও স্থানত বিগত বাৰিষাৰ সময়চোৱাতে ক্ষতি সাধন হৈছিল ৷

লগতে পঢ়ক :Flood In Lakhimpur: লখিমপুৰত বানৰ তাণ্ডৱ, শিঙৰা নদীৰ ছিগিল মথাউৰি

বিশেষকৈ লখিমপুৰ নগৰৰ সমীপৰ বগলীজানৰ পৰা বৰবিল পৰ্যন্ত নদীখনে মথাউৰিটোত খহনীয়া সৃষ্টি কৰিছিল । কিন্তু বিভাগৰ প্ৰচেষ্টাত তেতিয়া কোনোমতে মথাউৰিটো ৰক্ষা পৰিছিল । বিগত বাৰিষা শেষ হৈ খৰালি কাল পাৰ হোৱাৰ পাচতো জলসম্পদ বিভাগে মথাউৰিটোৰ ছিগি অংশবোৰ মেৰামতি কৰা পৰিলক্ষিত নহ’ল ৷

লক্ষ্যণীয় বিষয় যে, যিখন ৰঙানদীত প্ৰতিবছৰে বাৰিষা কালত নীপকোৱে জলবিদ্যুৎ প্ৰকল্পৰ পৰা পানী এৰি দিয়ে, সেইখন নদীৰ মথাউৰি সুৰক্ষাৰ নামত মাত্ৰ বাঁহৰ গোজ পুঁতিছে বিভাগে । যাক লৈ বিভিন্ন দল সংগঠনে ক্ষোভ প্ৰকাশ কৰিছে । বিভাগৰ এনে পালমৰা কামৰ বাবে লখিমপুৰ বিধ্বস্ত হ’লে বিভাগটোৱেই জগৰীয়া হ’ব বুলি সতৰ্কবাণী শুনাইছে সংগঠনসমূহে ।

লগতে পঢ়ক :Flood in Lakhimpur: লখিমপুৰৰ বন্যাৰ্তৰ কাষত জন প্ৰতিনিধিৰ দল; প্ৰয়োজনীয় সহায়ৰ আশ্বাস