শ্ৰীশ্ৰী বদলা পদ্ম আতাৰ ৪৭৪ সংখ্যক জন্ম জয়ন্তী উদযাপন

দেশজুৰি বাহাল থকা লক ডাউনৰ বাবে মহাপুৰুষ জনৰ ৪৭৪ সংখ্যক জন্ম জয়ন্তী ভাগ উলহ মালহেৰে উদযাপন কৰিব পৰা নাই তেঁওৰ শিষ্য সকলে ৷ মহাপুৰুষ মাধৱদেৱে উজনি অসমত ধৰ্মপ্ৰচাৰক হিচাপে দ্বায়িত্ব অৰ্পন কৰিছিল এই গৰাকী মহাপুৰুষ শ্ৰীশ্ৰী বদলা পদ্ম আতাক ৷

বিহপুৰীয়া, 2 জুন: আজি অসমৰ তৃতীয়জন মহাপুৰুষ হিচাপে স্বীকৃত শ্ৰীশ্ৰী বদলা পদ্ম আতাৰ ৪৭৪ সংখ্যক জন্ম জয়ন্তী ৷ মহাপুৰুষ মাধৱদেৱে উজনি অসমত ধৰ্মপ্ৰচাৰক হিচাপে দ্বায়িত্ব অৰ্পন কৰিছিল এই গৰাকী মহাপুৰুষ শ্ৰীশ্ৰী বদলা পদ্ম আতাক ৷ উক্ত দায়িত্ব লাভ কৰাৰ পাছতেই নাৰায়ণপুৰৰ বদলা পদ্মআতা সত্ৰৰ পৰা মাজুলীৰ কমলাবাৰী সত্ৰলৈকে উজনি অসমত মুঠ ২৪ খন সত্ৰ প্ৰতিষ্ঠা কৰিছিল গুৰুজনে ৷

কিন্তু বৰ্তমান সময়ত কৰ'ণা সন্ত্ৰাসৰ বাবে দেশজুৰি বাহাল থকা লক ডাউনৰ বাবে মহাপুৰুষ জনৰ ৪৭৪ সংখ্যক জন্ম জয়ন্তী ভাগ উলহ মালহেৰে উদযাপন কৰিব পৰা নাই শিষ্য সকলে ৷ উল্লেখ্য যে, লক ডাউনৰ বাবে পদ্ম আতাৰ জন্মোৎসৱ ভাগ কেৱল পতাকা উত্তোলনেৰেই সামৰিব লগা হ'ল জন্মস্থান সক্ৰাহী সত্ৰত ৷ তেঁওৰ জন্মস্থানৰ উপৰিও চতিয়া, তেজপুৰ গেৰুৱা, গুৱাহাটী, বৰজহা (নগাঁও), মৰিগাঁৱৰ লালাবৰী, মাজুলী আদি ঠাইতো অনুষ্টুপীয়াকৈ পালন কৰা হৈছে বৈষ্ণৱ গুৰু গৰাকীৰ জন্মোৎসৱ ৷

উল্লখ্য যে, বদলা পদ্ম আতা সেৱা সমিতিৰ উদ্যোগত প্ৰত্যেক বছৰে কেন্দ্ৰীয়ভাৱে ৰাজ্যৰ নিৰ্দিষ্ট স্থানত মহাপুৰুষ জনাৰ জন্মোৎসৱ পালন কৰি আহিছে শিষ্যসকলে ৷ কিন্তু এই বৰ্ষত কৰ'ণা মহামাৰীৰ বাবে সামাজিক দূৰত্ব মানি চলি নূণ্যতম ভক্তৰ উপস্থিতিত সেৱা সমিতিৰ পতাকা উত্তোলনেৰেই সামৰিব লগা হ'ল অনুষ্ঠান ৷

উল্লেখযোগ্য যে, উক্ত জন্মোৎসৱৰ লগত সংগতি ৰাখি সেৱা সমিতিয়ে অনলাইন যোগে আয়োজন কৰিছে এখন একক খোল বাদন আৰু সত্ৰীয়া নৃত্যৰ প্ৰতিযোগিতা ৷ 2 জুনৰ পৰা 6 জুনৰ ভিতৰত baruahupen2013@gmail.com আৰু atulbhuyan123@gmail.com যোগে ইচ্ছ্যুক প্ৰতিযোগীয়ে উক্ত প্ৰতিযোগিতাত অংশগ্ৰহণ কৰিব পাৰিব ৷ পৰৱৰ্তী সময়ত বিচাৰকৰ বিচাৰৰ ভিত্তিত ১২ জুনত ফলাফল ঘোষণা কৰা হ'ব বুলি জানিবলৈ দিছে পদ্ম আতা সেৱা সমিতিৰ সাধাৰণ সম্পাদক উপেন চন্দ্ৰ বৰুৱাই ৷