তাঁত শিল্পৰে স্বাৱলম্বী কোকৰাঝাৰৰ এখন বিশেষ গাঁও

কোকৰাঝাৰ জিলাৰ ভৱানীছৰা নামৰ গাঁৱখনৰ কেইবাটাও পৰিয়ালে তাঁত শিল্পৰ জৰিয়তে দেখুৱাইছে স্বাৱলম্বীতাৰ নিৰ্দৰ্শন

কোকৰাঝাৰ , 10 এপ্ৰিল : তাঁত শিল্পৰ ব্যৱসায়েৰে স্বাৱলম্বী কোকৰাঝাৰৰ এখন বিশেষ গাঁও ৷ যি গাঁৱত আজি বিগত বছৰ বছৰ ধৰি বিভিন্ন ধৰণৰ গামোচাৰ পৰা আৰম্ভ কৰি চাদৰ-মেখেলা আৰু ভিন্ন জাতীয় কাপোৰ তৈয়াৰীৰে জীৱন নিৰ্বাহ কৰি আহিছে গাঁৱখনৰ কেইবাটাও পৰিয়ালে ৷

কোকৰাঝাৰ জিলাৰ ভৱানীছৰা নামৰ গাঁৱখনৰ কেইবাটাওপৰিয়ালে বৰ্তমান সময়ৰ দৰে প্ৰযুক্তি বিদ্যাৰ দিনতো তাঁত শিল্পৰ জৰিয়তে দাঙি ধৰিবলৈ সক্ষম হৈছে স্বাৱলম্বীতাৰ উৎকৃষ্ট নিদৰ্শন৷ ভৱানীছৰাস্থিত অজিত দেৱনাথ নামৰ লোকজনৰ সমান্তৰালকৈ উক্ত গাঁৱখনৰ কেইবাটাও পৰিয়ালে আজি তাঁত শিল্পকে জীৱিকা অৰ্জনৰ অন্যতম আহিলা হিচাপে বাচি লৈ চলাই গৈছে জীৱন সংগ্ৰাম ৷ উল্লেখ্য যে বৰ্তমান সময়ত সূতাৰ দাম বৃদ্ধি পোৱাত গাঁৱখনৰ শিপিনী আৰু ব্যৱসায়ীসকলৰ মাজত কিছু বাধাই দেখা দিছে ৷ কিন্তু বিভিন্ন বাধাকো নেওচি একাংশ শিপিনী আৰু ব্যৱসায়ীয়ে পাইকাৰী দৰত হলেও কোকৰাঝাৰৰ বিভিন্ন অঞ্চলত পূৰণ কৰি আহিছে গামোচা আৰু চাদৰ মেখেলাকে ধৰি ভিন্ন জাতীয় কাপোৰৰ চাহিদা ৷