কোকৰাঝাৰ, 25 মে': উচ্চতৰ মাধ্যমিক পৰীক্ষাৰ আজি ঘোষিত ফলাফলত বড়ো মাধ্যমৰ একমাত্ৰ শিক্ষানুষ্ঠান ইউ এন একাডেমীৰ এশ শতাংশ ছাত্ৰ ছাত্ৰী উত্তীৰ্ণ হোৱাৰ ফলত উৎফুল্লিত হৈ পৰিছে বিটিএডিৰ সদৰ কোকৰাঝাৰ৷ ফলাফলৰ দিনাই ইউ এন একাডেমীৰ চৌহদত কলা আৰু বিজ্ঞান শাখাত সুখ্যাতিৰে প্ৰথম বিভাগত উত্তীৰ্ণ ছাত্ৰ ছাত্ৰীসকলক উৎসাহিত কৰিবলৈ একোখনকৈ আঁৰনায় আৰু প্ৰশস্তি পত্ৰ প্ৰদান কৰা হয়৷
ইউ এন একাডেমীৰ সঞ্চালক কৃষ্ণ গোপাল বসুমতাৰীয়ে আঁত ধৰা সম্বধৰ্না অনুষ্ঠানত মুখ্য অতিথি হিচাপে উপস্থিত থাকে ৰাজ্যসভাৰ প্ৰাক্তন সাংসদ উৰ্খাও গৌড়া ব্ৰহ্ম ৷ উল্লেখ্য যে, শিক্ষানুষ্ঠানটোত উচ্চতৰ মাধ্যমিকৰ বিজ্ঞান শাখাত অৱতীৰ্ণ ১৩৭ গৰাকী শিক্ষাৰ্থীৰ মাজত প্ৰথম স্থানত ৪৯, দ্বিতীয় স্থানত ৭৯ আৰু তৃতীয় স্থানত ০৯ গৰাকী শিক্ষাৰ্থী উত্তীৰ্ণ হয় । আনহাতে কলা শাখাত ১৭৪ গৰাকী অৱতীৰ্ণ হৈছিল আৰু তাৰে প্ৰথম স্থানত ৬৮ গৰাকী,দ্বিতীয় স্থানত ৯১ গৰাকী আৰু তৃতীয় স্থানত ১৫গৰাকী ছাত্ৰ-ছাত্ৰী উত্তীৰ্ণ হয় ৷
