বিটিআৰ পৰিষদৰ কাৰ্যবাহী সদস্য পদত পুনৰ চাৰিগৰাকীক মনোনিত

পুনৰ চাৰিগৰাকী নিৰ্বাচিত সদস্যক বিটিআৰ পৰিষদৰ কাৰ্যবাহী সদস্য হিচাপে মনোনিত কৰা হয় । কাৰ্যবাহী সদস্যৰ পদ লাভ কৰা এই চাৰিগৰাকী সদস্যই ১৮ ডিচেম্বৰত বিটিচিৰ বিধান পৰিষদত আনুষ্ঠানিকভাৱে শপত গ্ৰহণ কৰিব ।

কোকৰাঝাৰ, 18 ডিচেম্বৰ :ৰাজ্যপালৰ সচিব মিনাক্ষী সুন্দৰমে জাৰি কৰা এক নিৰ্দেশনা (মেমো নং জিএচএ ৩৩ / ২০১০/৬২০) অনুসৰি পুনৰ চাৰিগৰাকী নিৰ্বাচিত সদস্যক বিটিআৰ পৰিষদৰ কাৰ্যবাহী সদস্য হিচাপে মনোনিত কৰা হয় । সেই অনুসৰি কোকৰাঝাৰ জিলাৰ ৬ নং কচুগাঁও পৰিষদীয় সমষ্টিৰ পৰা জয়লাভ কৰা ইউপিপিএল দলৰ নিৰ্বাচিত পৰিষদীয় সদস্য উকিল মুছাহাৰী আৰু ৭ নং ফকিৰাগ্ৰাম পৰিষদীয় সমষ্টিৰ বিজেপি দলৰ নিৰ্বাচিত পৰিষদীয় সদস্য অৰুপ কুমাৰ দেক বিটিআৰ পৰিষদত কাৰ্যবাহী সদস্য ৰূপে মনোনীত কৰা হয় ৷

বিটিআৰ পৰিষদৰ কাৰ্যবাহী সদস্য পদত চাৰিগৰাকী নিৰ্বাচিত প্ৰাৰ্থী

নিৰ্বাচিত সদস্যৰ পৰা কাৰ্যবাহী সদস্যৰ পদ লাভ কৰা আন দুগৰাকী প্ৰাৰ্থী হ'ল ক্ৰমে ২৯ নং সুক্লাই চেৰফাং সমষ্টিৰ পৰা জয়লাভ কৰা বিজেপিৰ ৰনেন্দ্ৰ নাৰ্জাৰী আৰু ১৪ নং চিৰাং দূৱাৰ সমষ্টিৰ পৰা জয়লাভ কৰা ইউপিপিএলৰ ৰঞ্জিত কুমাৰ বসুমতাৰী ওৰফে বি আৰ ফেৰেংগা ৷

ইফালে, কোকৰাঝাৰৰ নিৰ্বাচিত প্ৰাৰ্থী দুগৰাকীয়ে কাৰ্যবাহী সদস্যৰ পদ লাভ কৰাত সমষ্টিবাসীৰ মাজত আনন্দৰ বন্যা বৈছে । বিশেষকৈ ফকিৰাগ্ৰাম সমষ্টিৰ পৰা বিজেপিৰ অৰূপ কুমাৰ দেয়ে কাৰ্যবাহী সদস্যৰ পদ লাভ কৰাত এক আনন্দমূখৰ পৰিবেশে বিৰাজ কৰিছে সমষ্টিটোত ।

উল্লেখ্য যে, কাৰ্যবাহী সদস্যৰ পদ লাভ কৰা চাৰিওগৰাকী সদস্যই অহা ১৮ ডিচেম্বৰত বিটিচিৰ বিধান পৰিষদত আনুষ্ঠানিকভাৱে শপত গ্ৰহণ কৰিব ।

লগতে পঢ়ক:পৰ্যটনৰ নতুন সম্ভাৱনা ইতিহাস সমৃদ্ধ চাচনি মেৰবিল