কোকৰাঝাৰ, 12 নবেম্বৰ : ‘‘অন্তিম শ্বাস লোৱা পৰ্যন্ত সদৌ অসম ছাত্ৰ সন্থাৰ হৈ সেৱা কৰি যাম’’- অৱসৰৰ গুজৱ উঠি থকাৰ মাজতে এই মন্তব্য কৰিছে সমুজ্জ্বল কুমাৰ ভট্টাচাৰ্যই ৷ এক প্ৰকাৰ যেন নিশ্চিত হৈ পৰিছে সমুজ্জ্বল কুমাৰ ভট্টাচাৰ্যৰ আছু ত্যাগ ৷ নিজৰ স্থিতিত বৰ্তমানেও অটল হৈ আছে সমুজ্জ্বল ভট্টাচাৰ্য ৷ শেহতীয়াভাৱে আছুৰ জ্যেষ্ঠ নেতা গৰাকীৰ ভাষ্যইও ইয়াৰ উমান দিছে ৷ ওদাগুৰিত অনুষ্ঠিত সদৌ ওদালগুৰি জিলা ছাত্ৰসন্থাৰ বাৰ্ষিক অধিবেশনৰ মঙলবাৰে অনুষ্ঠিত প্ৰতিনিধি সভাত অংশ লয় সমুজ্জ্বল কুমাৰ ভট্টাচাৰ্যই ৷ আছুৰ মুখ্য উপদেষ্টা জনে সাংবাদিকৰে হোৱা বাৰ্তালাপত দুলীয়াজানত অনুষ্ঠিত হ'ব লগীয়া সদৌ অসম ছাত্ৰ সন্থাৰ কেন্দ্ৰীয় অধিৱেশনত ছাত্ৰ-ছাত্ৰী সকলৰ সুৰক্ষিত শৈক্ষিক ভৱিষ্যত নিশ্চিত কৰা বিষয়টো প্ৰধান বিষয় হ'ব বুলি উল্লেখ কৰে ।
ইয়াৰ লগতে বিভিন্ন জাতি-জনজাতি, জনগোষ্ঠী, ধৰ্মালম্বী লোকেৰে গঠিত খিলঞ্জীয়া মানুহৰ অসমত প্ৰভূত্ব, নিয়ন্ত্ৰণ থকাৰ লগতে অসম খন আমাৰ হৈ থাকিব লাগিব বুলি সমুজ্জ্বল কুমাৰ ভট্টাচাৰ্যই মন্তব্য কৰে । তেওঁ লগতে অসমত এখন পৰিকল্পিত অৰ্থনৈতিক সংগ্ৰামৰ অত্যন্ত প্ৰয়োজন আছে বুলিও উল্লেখ কৰে । ইপিনে আছুৰ আগন্তুক দুলীয়াজান অধিৱেশনতে অৱসৰ গ্ৰহণ কৰাৰ কথা পুনৰ বাৰ উল্লেখ কৰি শেষ নিশ্বাস থকালৈকে সদৌ অসম ছাত্ৰ সন্থাৰ বাবে সেৱা কৰি যাম বুলিও মন্তব্য কৰে সমুজ্জ্বল ভট্টাচাৰ্যই । তেওঁ লগতে দলীয় আৰু নিৰ্বাচনী বৃত্তৰ বাহিৰত থাকি অসম আৰু খিলঞ্জীয়া মানুহৰ হকে কাম যাম বুলিও পুনৰ বাৰ স্পষ্ট কৰি দিয়ে ।