কোকৰাঝাৰ, 2 জুন: দুদিন পূৰ্বে মেলা সদৃশ পৰিৱেশ হৈ থকা উত্তৰ পূৱৰ দুৱাৰমুখ শ্ৰীৰামপুৰত মঙলবাৰে নিমাওমাও পৰিৱেশ পৰিলক্ষিত হয় ৷ বহিঃৰাজ্যৰ পৰা অহা হাজাৰ হাজাৰ লোকৰ পঞ্জীয়ন আৰু স্কেনিঙত ব্যস্ত হৈ থকা পৰীক্ষণ চকীত অতি কম সংখ্যক কৰ্মচাৰী দেখা পোৱা যায় ৷ উত্তৰ পূৱৰ দুৱাৰমুখ তথা আন্তঃৰাজ্যিক তালাচী চকী শ্ৰীৰামপুৰ পৰীক্ষণ চকীত নাই মানুহৰ দীঘলীয়া শাৰী। দুদিন পূৰ্বে অজস্ৰ লোকৰ কোলাহল হৈ থকা শ্ৰীৰামপুৰ পৰীক্ষণ চকীত আজি কৰ্মচাৰীৰ ব্যস্ততাও কমি আহিছে ৷ কাৰণ ক্ৰমাৎ হ্ৰাস পাইছে বহিঃৰাজ্যৰ পৰা অহা লোকৰ সংখ্যা ৷ মঙলবাৰে শ্ৰীৰামপুৰত বিগত দিনৰ সম্পূৰ্ণ এখন বিপৰীত ছবি পৰিলক্ষিত হয় ৷ আনহাতে মঙলবাৰৰ পৰা কোকৰাঝাৰৰ লগতে গোসাঁইগাঁৱত বহি-ৰাজ্যৰ পৰা অহা ৰে'লসমূহ ৰখোৱা হ'ব বুলি জানিবলৈ দিয়ে গোসাঁইগাঁও মহকুমাধিপতিয়ে ।
শ্ৰীৰামপুৰত তালাচী চকীত হ্ৰাস পাইছে বহিঃৰাজ্যৰ পৰা অহা লোকৰ সংখ্যা