কোকৰাঝাৰ, ৭ আগষ্ট :কোকৰাঝাৰ জিলাৰ বালাগাঁওস্থিত চেইণ্ট এননচ কলেজৰ (St. Anns College) উচ্চতৰ মাধ্যমিকৰ প্ৰথম বৰ্ষৰ ছাত্ৰ তথা চিৰাং জিলাৰ কয়লাময়লাৰ হাতিমাৰা নিৱাসী সানশ্ৰাং নাৰ্জাৰীৰ শনিবাৰে গৌৰাং নদীত সলিল সমাধি ঘটে । চেইণ্ট এননচ কলেজৰ কাষতে থকা হোষ্টেলত থাকি অধ্যায়ন কৰা অমায়িক সানশ্ৰাং নাৰ্জাৰীৰ মৃতদেহ নিকটৱৰ্তী গৌৰাং নদীত উদ্ধাৰ কৰা হয় ।
গৌৰাং নৈত গা ধুবলৈ গৈ সলিল সমাধি ঘটা বুলি মৃত সানশ্ৰাঙৰ সতীৰ্থই প্ৰকাশ কৰিছে যদিও সানশ্ৰাং নাৰ্জাৰীৰ মৃত্যু প্ৰকৃততে এক হত্যাকাণ্ড বুলি অভিযোগ কৰিছে পৰিয়ালৰ লোকে । প্ৰাপ্ত বাতৰি মতে, শনিবাৰে বিয়লি সানশ্ৰাং নাৰ্জাৰীৰ লগতে ৭ গৰাকী সতীৰ্থই বালিগাঁও গৌৰাং নদীত গা ধুবলৈ গৈছিল । কিন্তু ৭ জন সতীৰ্থ উভতি আহে যদিও সানশ্ৰাং উভতি নাহিল ।
হোষ্টেললৈ উভতি আহি সতীৰ্থসকলে প্ৰথমে কথাটো গোপনে ৰাখিবলৈ চেষ্টা কৰে যদিও পিচত সকলো কথা ওলাই পৰে আৰু নিশা প্ৰায় ১১ বজাত হোষ্টেল কৰ্তৃপক্ষই পৰিয়ালৰ লোকক ঘটনাৰ বিষয়ে অৱগত কৰে । তাৰ পাচতে দেওবাৰে পুৱা স্থানীয় ৰাইজে সানশ্ৰাং নাৰ্জাৰীৰ মৃতদেহটো গৌৰাং নদীৰ মাজৰ পৰা উদ্ধাৰ কৰে ৷
মৃতদেহটোৰ কাণ আৰু নাকেৰে তেজ নিগৰি অহালৈ চাই পৰিয়ালৰ লোকে এয়া হত্যাকাণ্ড বুলি দাবী কৰিছে । অৱশ্যে দেওবাৰে পুৱাৰ ভাগতে আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে বৰপেটা মেডিকেল কলেজলৈ প্ৰেৰণ কৰে ৷ মৃতদেহটোৰ মৰণোত্তৰ পৰীক্ষাৰ প্ৰতিবেদন লাভ কৰাৰ পিচতহে প্ৰকৃত তথ্য পোহৰলৈ আহিব ৷