কোকৰাঝাৰ, 1 অক্টোবৰ : কোকৰাঝাৰ জিলাৰ বিভিন্ন প্ৰান্তত ক্ৰমাৎ মহিলাৰ ওপৰত অনৈতিক কাৰ্যকলাপ বৃদ্ধি পাই অহাত আতংকিত হৈ পৰিছে জিলাখনৰ মহিলাসকল ৷ ঘৰত অকলে থকা মহিলাৰ ওপৰত দুষ্টচক্ৰই সংজ্ঞাহীন স্প্ৰে ছতিয়াই অনৈতিক কাৰ্যত লিপ্ত হোৱাৰ খবৰ সমগ্ৰ জিলাতে বিয়পি পৰিছে ৷ ইয়াৰ লগতে চুৰৰ সন্ত্ৰাস আৰু সোপাধৰাৰ ভুৱা বাতৰিয়েও কোকৰাঝাৰ জিলা প্ৰশাসনক চিন্তিত কৰি তুলিছে ৷
সেয়েহে, সোমবাৰে বড়োলেণ্ড ছাত্ৰ সন্থা, এবিএমছু, সদৌ অসম বেংগলী ছাত্ৰ ফেডাৰেচন, আগসু, হিন্দীভাষী পৰিষদ আদি বিটিএডিৰ ছাত্ৰ সংগঠনসমূহে এক প্ৰতিবাদী কাৰ্যসূচী ৰূপায়ন কৰে ৷ বিভিন্ন স্কুল আৰু কলেজৰ ছাত্ৰ-ছাত্ৰীকে ধৰি সমাজ কৰ্মীসকলেও এই প্ৰতিবাদী কাৰ্যসূচীত অংশগ্ৰহণ কৰে আৰু দুষ্টচক্ৰক আটক কৰি শাস্তি প্ৰদানৰ অভিযোগ উত্থাপন কৰে ৷ কোকৰাঝাৰ টেঙাপাৰাস্থিত বিএছইউৰ মুখ্য কাৰ্যালয়ৰ পৰা জেদ.ডি পথ হৈ কোকৰাঝাৰ জিলা উপায়ুক্তৰ কাৰ্যালয়ত উপস্থিত হৈ তেওঁক স্মাৰক পত্ৰ প্ৰেৰণ কৰে প্ৰতিবাদকাৰীয়ে ৷
বড়োলেণ্ড ছাত্ৰ সন্থাৰ সভাপতি স্বগমছাৰ বসুমতাৰীয়ে এই সম্পৰ্কত মন্তব্য কৰে যে, দেশৰ প্ৰধানমন্ত্ৰী নৰেন্দ্ৰ মোদীয়ে দিয়া 'বেটি বচাও বেটি পড়াও' শ্লোগান অসমত কেৱল শ্লোগানহে হৈ ৰৈছে । কোকৰাঝাৰ পৌৰসভা আৰু প্ৰশাসনৰ উদ্যোগত এই পৰিবেশক লৈ এখন গুৰুত্বপূৰ্ণ সভা অনুষ্ঠিত কৰা হয় ৷
