গোসাইগাঁও, ১০আগষ্ট: সোমবাৰৰ এই অভিযান কালত কোকৰাঝাৰ আৰক্ষীয়ে এটা বৃহৎ পৰিমানৰ অস্ত্ৰ ভাণ্ডাৰ উদ্ধাৰ কৰিবলৈ সক্ষম হয় । গোসাইগাঁও আৰু কোকৰাঝাৰ আৰক্ষীৰ এই যৌথ অভিযানটোৰ নেতৃত্ব দিছিল জিলাখনৰ অতিৰিক্ত আৰক্ষী অধীক্ষক মুকুট ৰাভাই ।
গোসাইগাঁৱৰ পানীজানী গাঁৱৰ হাবিৰ মাজত পলিঠিনেৰে মেৰিয়াই মাটিত পুতি থোৱা অৱস্থাত উদ্ধাৰ হয় এই অস্ত্ৰ-শস্ত্ৰ খিনি ।
আৰক্ষীৰ এই সফল অভিযানত উদ্ধাৰ হৈছে দুটা স্বয়ংক্ৰিয় একে ৪৭, তিনিটা মেগজিন, একে ৭:৬২ এমএমৰ সজীৱ গুলী, ৩৬ এইচ ইৰ দুটা গ্ৰেনেড আৰু দুটা ডিটেনেটৰ । উদ্ধাৰ হোৱা এই অস্ত্ৰখিনি পূৰ্বৰ কোনো উগ্ৰপন্থী সংগঠনৰে হ'ব বুলি সন্দেহ কৰিছে আৰক্ষীয়ে ।
আগন্তক বিটিচি নিৰ্বাচনৰ পূৰ্বে জিলাখনৰ লগতে বিটিচি এলেকাত এনেদৰে সঘনাই অস্ত্ৰ শস্ত্ৰ উদ্ধাৰ হৈ থকা ঘটনাই এতিয়া অধিক তাৎপৰ্য বহন কৰিছে ।
পূৰ্বে শান্তি আলোচনাত বহি মূলসূতিলৈ অহা কোনো উগ্ৰপন্থী সংগঠনৰ সদস্যই বিটিচি নিৰ্বাচনৰ প্ৰাক মুহুৰ্তত ৰক্তাক্ত পৰিবেশ সৃষ্টি কৰাৰ পৰিকল্পনাৰে এনেদৰে অস্ত্ৰ শস্ত্ৰ লুকাৱাই ৰখাৰো সন্দেহ কৰিছে আৰক্ষীয়ে ।
