কোকৰাঝাৰত উপস্থিত নৱ-নিৰ্বাচিত সাংসদ ৰণগৌৰা নাৰ্জাৰী

কোকৰাঝাৰৰ ইউপিপিএল দলৰ কাৰ্যালয়ত উপস্থিত নৱ নিৰ্বাচিত সাংসদ ৰণগৌৰা নাৰ্জাৰী ৷ দলীয় নেতা-কৰ্মীৰ মাজত উৎসাহ ৷ ফটকা ফুটাই, নৃত্য-গীতেৰে বিপুল আদৰণি ৰণগৌৰাক (MP Rangaura Narjari in Kokrajhar) ৷

কোকৰাঝাৰ, 1 এপ্ৰিল: ৰাজ্যসভাৰ সাংসদ হিচাপে নিৰ্বাচিত ইউপিপিএল প্ৰাৰ্থী ৰণগৌৰা নাৰ্জাৰীক শুকুৰবাৰে উষ্ম আদৰণি জনায় দলৰ নেতা-কৰ্মীসকলে (MP Rangaura Narjari in Kokrajhar)৷ নৱ-নিৰ্বাচিত সাংসদ ৰণগৌৰা নাৰ্জাৰী কোকৰাঝাৰ চহৰৰ বডোফা নগৰস্থিত ইউপিপিএল দলৰ মুখ্য কাৰ্যালয়ত উপস্থিত হোৱাত সহস্ৰাধিক দলীয় নেতা-কৰ্মীয়ে আৰনাই আৰু পুষ্প মালাৰে আদৰণি জনোৱাৰ লগতে নৃত্য আৰু ফটকা ফুটাই হৰ্ষোল্লাস কৰা পৰিলক্ষিত হয় ৷

ইপিনে ৰণগৌৰা নাৰ্জাৰীয়ে দলীয় কাৰ্যালয়ত এক সংবাদমেল সম্বোধন কৰি দলীয় কৰ্মকৰ্তাসকলক ধন্যবাদ জনায় ৷ ইয়াৰোপৰি প্ৰতিশ্ৰুতি অনুসৰি ৰাজ্যসভাৰ এখন আসন মিত্ৰদল ইউপিপিএলক এৰি দিয়াৰ বাবে মুখ্যমন্ত্ৰীক ধন্যবাদ জ্ঞাপন কৰে ৷ লগতে বিজেপি আৰু অগপৰ নেতৃত্ববৃন্দকো ধন্যবাদ জনালে নাৰ্জাৰীয়ে ৷ বিজেপিৰ সবকা সাথ, সবকা বিকাশৰে ৰাষ্ট্ৰীয় দল এটিৰ লগত কাম কৰিলে উন্নয়নৰ গতি ত্বৰাম্বিত হ’ব বুলি মন্তব্য কৰে নাৰ্জাৰীয়ে ৷

বিটিআৰ চুক্তিৰে শান্তি প্ৰতিষ্ঠা হোৱাত বিটিআৰ অঞ্চলত দীৰ্ঘদিনৰ পৰা দাবী কৰি অহা সশস্ত্ৰ বাহিনীৰ বিশেষ ক্ষমতা আইন প্ৰত্যাহাৰ কৰা হ’ল ৷ তেওঁ মুখ্যমন্ত্ৰী হিমন্ত বিশ্ব শৰ্মা আৰু প্ৰমোদ বড়োৰ বলিষ্ঠ নেতৃত্বত সবৰ্ত্ৰ উন্নয়ন সম্ভৱ হোৱা বুলি মন্তব্য কৰাৰ লগতে অসম চৰকাৰক বিপিএফৰ দলে সহযোগিতা আগবঢ়োৱাৰ বাবেও ধন্যবাদ জ্ঞাপন কৰে ৷

উল্লেখ্য যে, ৰাজ্যসভাৰ সাংসদ হিচাপে নিৰ্বাচিত হোৱা ৰণগৌৰা নাৰ্জাৰীয়ে শুকুৰবাৰে পুৱাই কোকৰাঝাৰ জিলাৰ দোতমাৰ থুলংগাপুৰীত বড়োফা উপেন্দ্ৰ নাথ ব্ৰহ্মৰ স্মৃতিসোধ আৰু প্ৰতিমূৰ্তিত মাল্যাৰ্পন কৰে ৷

লগতে পঢ়ক:নিলম্বনৰ পাছত বিধায়ক ছিদ্দিক আহমেদৰ বিস্ফোৰণ