কোকৰাঝাৰ, 18 জানুৱাৰী : কোকৰাঝাৰৰ নিকটৱৰ্তী ছটো মলানডুবিত দেবলাই ৰায় নামৰ এগৰাকী মহিলাক নৃশংসভাৱে হত্যা কৰা ঘাতক স্বামীক অৱশেষত আৰক্ষীয়ে গ্ৰেপ্তাৰ কৰিবলৈ সক্ষম হৈছে ৷ কোকৰাঝাৰ সদৰ আৰক্ষীয়ে বুধবাৰে গুৱাহাটী মহানগৰীৰৰ পল্টনবজাৰৰ পৰা হত্যাকাৰী স্বামী কনেশ ৰায়ক (58 ) গ্ৰেপ্তাৰ কৰে ৷ উল্লেখ্য যে 11 জানুৱাৰীত কনেশ ৰায়ে চোকা অস্ত্ৰৰে ডিঙি ৰেপি হত্যা কৰিছিল পত্নী দেবলাই ৰায়ক । হত্যা কৰি কোকৰাঝাৰৰ ছটো মলানডুবি গাঁৱৰ দৰদৰিয়া নৈত পেলাই দিছিল মৃতদেহ ৷
12 জানুৱাৰীত মহিলা গৰাকীৰ মৃতদেহ আৰক্ষীয়ে উদ্ধাৰ কৰিছিল ৷ পত্নীক হত্যা কৰাৰ পিছৰে পৰা পলাতক আছিল কনেশ ৰায় ৷ অৱশেষত বুধবাৰে কোকৰাঝাৰ আৰক্ষীয়ে গুৱাহাটীৰ পল্টন বজাৰৰ পৰা কনেশ ৰায়ক গ্ৰেপ্তাৰ কৰিবলৈ সক্ষম হয় ৷ উল্লেখ্য যে ইয়াৰ পূৰ্বেও অৰ্থাৎ 1997 চনত কনেশ ৰায়ে দেৱলীবালা ৰায় নামৰ এগৰাকী মহিলাৰে প্ৰেমৰ সম্পৰ্ক স্থাপন কৰিছিল ৷ দেৱলীবালা ৰায়ে বিবাহৰ বাবে জোৰ দিয়াত কনেশ ৰায়ে তেওঁকো হত্যা কৰি কোকৰাঝাৰৰ ভালুকঝোৰা জংঘলত মৃতদেহ পেলাই দিছিল ৷ দেৱলীবালা ৰায়ক হত্যা কৰাৰ অপৰাধত বহু বছৰ জেলত আছিল কনেশ ৰায় ৷
কিন্তু জামিনত মুক্ত হোৱাৰ পিছৰে পৰা সুদীৰ্ঘ বছৰ ধৰি পলাতক হৈ আছিল কনেশ ৰায় ৷ পলাতক হৈ থকাৰ সময়ছোৱাত কনেশ ৰায়ে গুৱাহাটী মহানগৰীৰ বিভিন্ন ঠাইত শ্ৰমিক হিচাপে কাম কৰি আছিল ৷ ইপিনে পলাতক হৈ থকা কালতে কোকৰাঝাৰৰ ভোটগাঁৱৰ নিকটৱৰ্তী জামাদৰ পাৰা গাঁৱৰ নিবাসী কনেশ ৰায়ে নিজকে নিৰঞ্জন ৰায় বুলি ভুৱা পৰিচয় দি প্ৰায় 6মাহ পূৰ্বে কোকৰাঝাৰ জিলাৰে গোসাইগাঁৱৰ দেবলাই ৰায় নামৰ মহিলাগৰাকীৰ সৈতে প্ৰেমৰ সম্পৰ্ক স্থাপন কৰে তিনিমাহ মান পূৰ্বে দেবলাই ৰায়ৰ সৈতে বিবাহ পাশত আবদ্ধ হয় ৷ দেবলাই ৰায়ৰ দ্বিতীয় পতি আছিল কনেশ ৰায় ৷