কোকৰাঝাৰ, 28 এপ্ৰিল :বডোফা ছুপাৰ 50 মিছনৰ অধীনত বিটিআৰ অঞ্চলৰ পৰা চিকিৎসা বিজ্ঞান তথা ভৱিষ্যতে একোগৰাকী সু-চিকিৎসক হ’বলৈ ইচ্ছুক ছাত্ৰ-ছাত্ৰীসকলক প্ৰদান কৰা হৈছে এক সুবৰ্ণ সুযোগ ৷ বিটিআৰ পৰিষদীয় চৰকাৰৰ উদ্যোগত গ্ৰহণ কৰা হৈছে এই সুন্দৰ পদক্ষেপৰ ৷ এই পদক্ষেপৰ অংশ হিচাবে বৃহস্পতিবাৰে বিয়লি বিটিআৰ সচিবালয়ৰ সভাকক্ষত বিটিআৰ পৰিষদীয় চৰকাৰ আৰু এলেন কোচিং ইন্সটিটিউট গুৱাহাটী চৌহদৰ মাজত এক বুজাবুজিৰ চুক্তি স্বাক্ষৰিত হয় (Bodoland Secretariat) ৷
বিটিআৰ পৰিষদীয় চৰকাৰৰ হৈ বিটিআৰৰ মুখ্য কাৰ্যবাহী প্ৰমোদ বড়ো, প্ৰধান সচিব অনুৰাগ গোৱেল আৰু এলেন কোচিং ইন্সটিটিউটৰ হৈ গুৱাহাটী চৌহদৰ প্ৰধান ব্ৰজেশ কুমাৰে চুক্তি পত্ৰখনত স্বাক্ষৰ কৰে ৷ চুক্তি স্বাক্ষৰিত হোৱাৰ পিচত এয়া বিটিআৰ অঞ্চলৰ বাবে এক শুভ বাৰ্তা তথা লক্ষণ বুলি অভিহিত কৰি বিটিআৰ প্ৰধান প্ৰমোদ বড়োৱে বডোফা ছুপাৰ ৫০ মিছনৰ অধীনত বিটিআৰ অঞ্চলত পৰ্যাপ্ত চিকিৎসক, অভিযন্তা, ভাৰতীয় প্ৰশাসনিক সেৱাৰ বিষয়াৰ লগতে অসম প্ৰশাসনিক সেৱাৰ যোগ্য প্ৰাৰ্থী গঢ় দিবলৈ প্ৰচেষ্টা চলোৱা হৈছে বুলি জানিবলৈ দিয়ে (BTR Chief Pramod Boro) ৷