গোসাইগাঁও, 3 ছেপ্তেম্বৰ : 31 আগষ্টত প্ৰকাশ পোৱা ৰাষ্ট্ৰীয় নাগৰিকপঞ্জীয়ে হাহাকাৰ সৃষ্টি কৰিছে ৰাজ্যৰ বিভিন্ন অঞ্চলত ৷ বৰ্তমান ভয় আৰু শংকাৰ মাজত দিন কটাইছে নাগৰিকপঞ্জীত নাম অন্তৰ্ভুক্ত নোহোৱা বহু পৰিয়ালে ৷ প্ৰকাশ পোৱা ৰাষ্ট্ৰীয় নাগৰিকপঞ্জীখন যে ক্ৰুটিমুক্ত নহয় সেই কথা পুনৰ প্ৰমাণিত কৰিছে গোসাইগাঁৱৰ ঘটনাই ৷
নাগৰিক পঞ্জীত অন্তৰ্ভুক্ত নহ'ল গোসাইগাঁও শ্ৰীৰামপুৰ কলনিৰ 6 শতাধিক লোক ৷ বঞ্চিত ৰাইজে জনোৱা মতে শ্ৰীৰামপুৰ কলনিত বসবাস কৰা প্ৰায় ১১৪ টা বঙালী হিন্দু পৰিয়াল ১৯৬৪ চনত পূৰ্ব পাকিস্তানৰ পৰা অসমলৈ আহিছিল ৷ এই ১১৪ টা পৰিয়ালক তদানীন্তন বিধায়ক মিথিয়াছ টুডু আৰু মন্ত্ৰী ৰূপনাথ ব্ৰহ্ম মিলিত হৈ অসম চৰকাৰৰ ৰাজহ বিভাগৰ উপৰি গৃহ বিভাগৰ লগত আলোচনা কৰি গোসাইগাঁও ৰাজহ চক্ৰৰ শ্ৰীৰামপুৰত ৮০ বিঘা চৰকাৰী মাটি প্ৰদান কৰি থকাৰ বাবে অনুমতি দিছিল । শ্ৰীৰামপুৰত বসতি কৰি অহা উক্ত ১১৪ টা পৰিয়াল বৃদ্ধি হৈ বৰ্তমান প্ৰায় ১১ শ পৰিয়াল হয়গৈ ।
উল্লেখযোগ্য যে ১৯৬৪ চনৰ পৰা বসতি কৰি অহা শ্ৰীৰামপুৰ কলনিৰ লোক সকলে সকলে আন নাগৰিকৰ দৰে ভোট প্ৰদান কৰি অহাৰ লগতে ভোগ কৰি আহিছে সকলো ধৰণৰ চৰকাৰী সুবিধা ৷ লগতে উক্ত পৰিয়াল সমূহৰ পূৰ্ব বংশৰ এন আৰ চি, লিগেচী ডাটা, ভূমিৰ নথি, স্কুল কলেজত অধ্যয়ন কৰা নথি আৰু পূৰ্ব পাকিস্তানৰ পৰা অসমত আহি প্ৰৱেশ কৰা ৰিফিউজি চাৰ্টিফিকেটো আছে । ভূমি অধিকাৰকে ধৰি অসম চৰকাৰৰ যাৱতীয় সা-সুবিধা আৰু গণতান্ত্ৰিক অধিকাৰ প্ৰদান কৰা এই সকল লোকক কিহৰ ভিত্তিত ৰাষ্ট্ৰীয় নাগৰিক পঞ্জীৰ পৰা আঁতৰাই ৰাখিছে সেয়া সকলোৰে মাজত প্ৰশ্নৰ উত্থাপন হৈছে । বৰ্তমান বিদেশী তালিকাত অন্তৰ্ভুক্ত হোৱাৰ আশংকাৰ মাজত দিন কটাইছে শ্ৰীৰামপুৰ কলনিৰ লোক সকলে ৷