ৰজ্যত বৃদ্ধি পাইছে যৌন নিৰ্যাতনৰ ঘটনা

ৰাজ্য়ত সঘনাই সংঘটিত হৈ আছে যৌন নিৰ্যাতনৰ ঘটনা ৷ একেদিনাই গুৱাহাটী আৰু গোসাইগাঁৱত গ্ৰেপ্তাৰ হ'ল দুজনকৈ যৌন নিৰ্যাতনত অভিযুক্ত ব্যক্তি ৷

কামৰূপ, 23 ছেপ্টেম্বৰ : ৰাজ্যত সঘনাই পোহৰলৈ আহি আছে যৌন নিৰ্যাতনৰ ঘটনা ৷ কিছুদিন পূৰ্বে উত্তৰ গুৱাহাটী পশু চিকিৎসালয়ৰ আৱাস গৃহত সংঘটিত যৌন নিৰ্যাতনৰ ঘটনাৰ অভিযুক্তক গ্ৰেপ্তাৰ আৰক্ষীৰ ৷ অভিযুক্ত ধৰ্ষণকাৰীজন হৈছে ৰাণী পশু উপ স্বাস্থ্য কেন্দ্ৰৰ কৰ্মচাৰী নেকিবুদ্দিন আহমেদ ৷ আটক নেকিবুদ্দিন আহমেদৰ কামনাৰ বলি হৈছিল 15 বছৰীয়া এগৰাকী কিশোৰী ৷ ঘৰত কোনো নথকাৰ সুযোগ লৈ কিশোৰী গৰাকীক উপৰ্যুপৰি যৌন নিৰ্যাতন চলাইছিল নেকিবুদ্দিনে ৷ ভয় ভাবুকিৰে সমগ্ৰ ঘটনাক লুকুৱাবলৈ চেষ্টা কৰিছিল নেকিবুদ্দিনে । এই সন্দৰ্ভত চাইল্ড লাইনৰ সহযোগত উত্তৰ গুৱাহাটী আৰক্ষী থানাত গোচৰ ৰুজু কৰিছিল কিশোৰীৰ পৰিয়ালে । এই গোচৰৰ ভিত্তিত নেকিবুদ্দিন আহমেদক সোমবাৰে গ্ৰেপ্তাৰ কৰে উত্তৰ গুৱাহাটী আৰক্ষীয়ে ৷

আনহাতে কোকৰাঝাৰ জিলাৰ গোসাইগাঁৱটো সংঘটিত হয় লজ্জাজনক কাণ্ড ৷ গোসাইগাঁৱৰ মাটিয়া পাৰা গাওঁৰ আলাউদ্দিন নামৰ ৩৩ বছৰীয়া এজন ব্যক্তিয়ে ধৰ্ষণৰ অপচেষ্টা চলায় এজনী ১৩ বছৰীয়া নাবালিকাক । ঘটনা অনুসৰি আলাউদ্দিন নামৰ ব্যক্তজনে ঘৰত কোনেও নথকাৰ সুযোগ লৈ কিশোৰী গৰাকীক ফুচুলাই তেওঁৰ নিজৰ ঘৰলৈ নি ধৰ্ষণৰ চেষ্টা চলায় ৷ কিন্তু উক্ত স্থানৰ পৰা নাবালিকা গৰাকী কোনোমতে পলাই আহি সমগ্ৰ ঘটনাৰ কথা নিজৰ পেহীয়েকক অৱগত কৰে ৷ উক্ত ঘটনাৰ ওপৰত দেওবাৰে সাপকাটা আৰক্ষী চকীত এখন এজাহাৰ দাখিল কৰে কিশোৰী গৰাকীৰ পৰিয়ালে ৷ উক্ত গোচৰৰ ভিত্তিত সাপকাটা আৰক্ষীয়ে তদন্ত চলাই গ্ৰেপ্তাৰ কৰে আলাউদ্দিন নামৰ ব্যক্তিজনক ৷ বৰ্তমান উক্ত নাবালিকা গৰাকীক স্বাস্থ্য পৰীক্ষাৰ বাবে গোসাইগাওঁ আৰ এন বি চিকিৎসালয়লৈ প্ৰেৰণ কৰে আৰক্ষীয়ে ৷