তিনিবছৰৰ অন্তত মুকলি আকাশৰ তললৈ আহিল মধুবালা মণ্ডল

কোকৰাঝাৰৰ ডিটেনশ্যন কেম্পৰ পৰা বুধবাৰে মুকলি হ'ল এইগৰাকী বয়োজ্যেষ্ঠ মহিলা

নিউজ ডেক্স,২৬ জুনঃ তিনিবছৰৰ অন্তত মুকলি আকাশৰ তললৈ আহিল স্বদেশতে বিদেশী হোৱা এগৰাকী মহিলা ।

৫৯ বছৰীয়া মধুবালা মণ্ডল নামৰ মহিলাগৰাকী বিদেশী ন্যায়াধীকৰণ তথা সীমান্ত আৰক্ষীৰ ভুলৰ বাবেই এগৰাকী প্ৰকৃত ভাৰতীয় হৈও এনেদৰে বিদেশী ৰূপে ডিটেনশ্যন কেম্পত বন্দী হৈ থাকিব লগা হৈছিল।স্থানীয় সমাজকৰ্মী অজয় ৰায় আৰু দল সংগঠন আৰু সংবাদ মাধ্যমৰ তৎপৰতাত বুধবাৰে প্ৰশাসনে মুকলি কৰি দিয়ে মহিলাগৰাকীক।বিজনীৰ ১ নং বিষ্ণুপুৰৰ বাসিন্দা মধুবালা মণ্ডলৰ(৫৯) স্বদেশী হোৱাৰ উপযুক্ত নথি-পত্ৰ থকাৰ পিছতো বিদেশী ন্যায়াধীকৰণ আদালতে মহিলা গৰাকীক ডিটেনশ্যন কেম্পলৈ প্ৰেৰণ কৰাৰ গুৰুতৰ অভিযোগ উত্থাপন কৰিছিল স্থানীয় ৰাইজে | এই অভিযোগ অনুসৰি যোৱা ২০১৬ বৰ্ষত বিদেশী ন্যায়াধীকৰণ আদালতে ১ নং বিষ্ণুপুৰৰ বাসিন্দা মাখন নমঃদাসৰ পত্নী মধুবালা দাসৰ নামত বিদেশীৰ জাননী জাৰি কৰে | কিন্তু ১৩ বছৰ আগতে মাখন নমঃদাস আৰু মধুবালা দাসৰ মৃত্যু হয়।কিন্তু একে গাঁৱৰে এই মধুবালা দাসৰ সলনি মধুবালা মণ্ডলকে কৰায়ত্ত কৰি ডিটেনশ্যন কেম্পত বন্দী কৰি ৰাখে।দুখৰ বিষয় যে, মাতৃ ডিটেনশ্যন কেম্পত থকা সময়ত মধুবালা মণ্ডলৰ একমাত্ৰ মুকবধিৰ কন্যা ফুলমালা মণ্ডল নিঠৰুৱা হৈ পৰিছিল।বুধবাৰে মাতৃক আদৰি ল'বলৈ ডিটেনশ্যন কেম্পলৈ আহিল ফুলমালা মণ্ডল ।