গোসাঁইগাঁৱত চাৰিদিনৰ পাছত জীৱন্তে উদ্ধাৰ নিৰুদ্দিষ্ট মহিলা

চাৰিদিনৰ পাছত পুখুৰীৰ মেটেকাৰ মাজত উদ্ধাৰ হ'ল জেউতি ডেকা নামৰ নিৰুদ্দিষ্ট মহিলাগৰাকী ৷

গোসাঁইগাঁও, 1 নৱেম্বৰ: অৱশেষত চাৰিদিনৰ অন্তত জীৱিত অৱস্থাত উদ্ধাৰ হ'ল কোকৰাঝাৰ জিলাৰ সদৰ চহৰ গোসাঁইগাঁৱৰ পৰা যোৱা ২৮ অক্টোবৰৰ পুৱাৰ পৰা নিৰুদ্দিষ্ট হৈ থকা গোসাঁইগাওঁ মহাবিদ্যালয়ৰ লাইব্ৰেৰীৰ কৰ্মচাৰী জেউতি ডেকা মেধী নামৰ চল্লিশ বছৰীয়া মহিলাগৰাকী ৷ শুকুৰবাৰে পুৱা প্ৰায় 5 বজাত চহৰখনৰ ৰাজাপাৰাস্থিত এটা নৱনিৰ্মিত গৃহৰ পিছফালে থকা মেটেকা ভৰা পুখুৰীৰ পৰা স্থানীয় ৰাইজে জীৱিত অৱস্থাত উদ্ধাৰ কৰে মহিলাগৰাকীক ৷ ঘটনা অনুসৰি 24 অক্টোবৰত মানসিক ভাৱে হতাশগ্ৰস্ততাত ভুগি সন্ধাহীন হৈছিল ৰাজাপাৰা ৩ নং বাৰ্ডৰ বাসিন্দা শিক্ষক প্ৰদীপ মেধীৰ পত্নী জেউতি ডেকা মেধী ৷ ঘটনা সন্দৰ্ভত মহিলাগৰাকীৰ পৰিয়ালৰ লোকে আৰক্ষীক খবৰ দিছিল যদিও বিগত চাৰিদিন আৰক্ষীয়ে মহিলাগৰাকীৰ কোনো শুংসুত্ৰ উলিয়াবলৈ সক্ষম হোৱা নাছিল ৷

ইফালে মহিলাগৰাকীক উদ্ধাৰ কৰি স্থানীয় ৰাইজে আৰ এন বি অসামৰিক চিকিৎসালয়ত ভৰ্ত্তি কৰে ৷ সম্প্ৰতি মহিলা গৰাকীক উন্নত চিকিৎসাৰ বাবে গুৱাহাটীলৈ প্ৰেৰণ কৰা হৈছে ৷ ইফালে মহিলা গৰাকী উদ্ধাৰ হোৱাৰ সময়ত তেওঁ পিন্ধি থকা শাৰীখন আৰু লগত লৈ থকা মবাইল ফন'টো উদ্ধাৰ নোহোৱাত সমগ্ৰ ঘটনাক কেন্দ্ৰ কৰি ৰহস্যৰ সৃষ্টি হৈছে ৷ ঘটনাৰ সবিশেষ বিচাৰি ইতিমধ্য়ে তদন্ত অব্যাহত ৰাখিছে আৰক্ষীয়ে ৷